登記成為會員，看更多精采內容！
您需要 登錄 才可以下載或查看，沒有賬號？登記成會員
×
復活節一連五天，一行十一人，展開台灣大、小金門旅行團。
5-4-2012 晚響深圳搭夜車往廈門，第朝日出到站，一覺訓醒到站。食過早餐後，搭船到金門。
五通碼頭
廈門來往金門航線響近代中國政治發展有特別意義，所以被稱為「小三通航線」。廈門有五通及東渡兩個來往金門嘅碼頭。我地由五通碼頭搭船，航程約半小時，完成簡單嘅出入境手續後，就「小三通」到咗台灣/台灣省。
島上大部分道路交匯處，都有機槍堡。
民房旁邊，總有一座半座坑道出入口。
之前同一 d 嘅人講開金門，只係得一個年紀頗大嘅人知道金門屬於台灣/台灣省，而認識嘅 80、90 後全部都唔知乜嘢係金門，包括有 d 以為台灣響台北入面。（即係一般美國中學生認知，香港響東京隔離一樣。）
入住離碼頭約半小時腳程嘅民宿，雙人房價錢約 NT$1800。而我住果間有兩層，上下各有一張床。 民宿乃閩式建築，約有九十年歷史，經翻新後批予營運者經營旅店。
第一天下午匆匆遊覽「莒光樓」、「建功嶼」及「金城鎮民防坑道」。「莒光樓」統戰味重，不過若從實際觀察，佢只係一間展品超小嘅金門歷史博物館，但對闡述金門歷史嘅深入就不及小金門嘅「烈嶼鄉文化館」。另一方面，位於金城鎮巴士站旁邊嘅「金城鎮民防坑道」，每小時一團，每次限五人（計一計，佢一年做唔到好多遊客......），所以旅行團一開二，第一隊遊覽「金城鎮民防坑道」，第二隊踩單車到「莒光樓」及「建功嶼」，之後行程互換。我帶完隊到「莒光樓」後，建議另一隊可去可唔去「莒光樓」，反而留多 d 時間到「建功嶼」 -- 潮退時可以行 / 踩單車過去呢個小島，遠眺廈門，近看鄭成功像。
從山上望建功嶼
岸邊遺留不少戒嚴時之防衛設施，不過論規模，呢度原來比唔上聽日會到嘅古寧頭及慈湖！
金城鎮民防坑道設有體驗路段 -- 睇睇 video 體驗一下。
金門縣政府除免費向遊客借出單車外，響大小金門兩島規劃咗幾條單車旅遊路線，將大部分景點囊括。所到之處，指示清晰，就算唔帶地圖都唔會容易盪失。
第二天主要以「金城鎮單車路線」及「金寧鄉單車路線」遊覽，密集走訪十幾個景點。
「瓊林坑道」係成個旅程唯一要收入場費嘅景點，收你十蚊台仔，就任你響入面玩，唔似「金城鎮民防坑道」有個講解員（可能佢驚有大陸特工......）陪你左右。
「翟山坑道」由零開始，響個山入面掘個大洞，通往海邊，俾戰船泊入嚟。
「珠山聚落」係一群閩式建築，裏面有「將軍第」、「大夫第」及「薛氏家廟」等歷史建築。
古寧頭戰場係近代中國史著名戰場，附近嘅慈湖對出海邊有比「建功嶼」更大嘅軍事設施。
海灘上有連綿幾公里嘅遺跡。
向大陸（敵軍）廣播用嘅「大喇叭」
第三天搭船到小金門。小金門正確名為「烈嶼鄉」，大小比大金門細，不過由於接近廈門，因此軍事布局比大金門多，主要軍事設施都集中島上。
旅行團捨棄單車，而包車遊小金門。價錢唔貴又慳時間，每人計番七十蚊港紙左右，好過踩單車。
「八達樓子」紀念當年死守金門之士兵。
「上林蚵管哨」唔響官方旅遊景點之列，只係中午經過呢條小村食晏，不過一樣有規模唔細嘅軍事設施，一樣精采（睇 video 啦）。
「湖井頭」內有體驗區，重現士兵駐守期間，每分每刻監察大陸（敵方），不過只要響右邊呢支望遠鏡「監視」敵方，就大概知道點解金門戒嚴咗咁耐，大陸都唔打過嚟；萬一打過嚟，金門嘅士兵應該守唔到幾耐。另一方面，據「烈嶼鄉文化館」指出，為咗防止金門人逃 / 投誠大陸（敵方），軍方嘅禁令嚴到想像唔到咁嚴。咁......究竟右邊望遠鏡會見到大陸嘅乜嘢呢？大家有機會到金門一遊，記得睇一睇。
《禁令知多少》
「湖井頭」沿海而行，就去到「勇士堡」與「將軍堡」。不過當日「勇士堡」正值維修，所以只可以到此一遊......又可以睇睇 video 。
「將軍堡」
「勇士堡」與「將軍堡」之間，有大片地雷區，生人勿近。
「九宮坑道」位於碼頭隔離，同「翟山坑道」一樣，通往海上，俾戰船停泊。
旅行團唔只遊覽以上景點，大、小金門兩島仲有唔少地方，有興趣可到以下相簿睇相。
復活節遊金門 (photo.eggstudio.com)：http://photo.eggstudio.com/index.php/gold-gate
團友相簿：https://picasaweb.google.com/116 ... v1sRgCNvyj8n5i4fYXQ
之後有時間關係，返到廈門後，包車到土樓一遊。另見福建南靖土樓遊
| 
發表於 16-4-2012 12:39:38
發表於 19-4-2012 13:37:18
