[感人短篇小說] 我今年七十八歲, 想同大家講一個故事

Homan

大家好，唔好睇我今年已經七十八歲，其實我已經係一個百歲人瑞。要講點解我既真實年齡同虛齡差成三十年咁多，可能講完你都唔會信，但我真係有一個好奇異既經歷…………

事源係咁既………話說七十八年前，亦即係我三十歲既時候，我可以話俾大家知我係一個不折不扣既毒撚。每日只係收埋自己係房裡面打機，基本上可以話係足不出戶，就連我呀爸呀媽都差ｄ唔認得我係佢地個仔。

點解我會成為一個咁毒撚既毒撚主要係因為中三個年俾我女神拒絕左，當年我都可算係有ｄ音樂才華，於是我滿懷自信咁自彈自唱左首自己作既愛的告白，然後燒錄左隻碟俾佢。但不幸既事就發生喇，話說當時自己有個習慣係將自己鐘意既ＡＶ燒晒落ｄ碟度收藏，為左掩人耳目我會係碟面頭寫低一ｄ比較純真既戲名做掩飾。

冇錯，當年我就係將一隻寫住天空之城既ＳＭ碟送左俾女神，自此以後我每日都過住俾人恥笑既生活。中五之後，會考失敗，我選擇左做隱青，一隱就隱左十幾年……..呢十幾年黎都係靠住做一d小買賣維生，好彩自己都有ｄ做生意既天份，眼光唔錯搵到少少錢，叫做養到下自己唔洗靠人咁。

如果要講呢十幾年，我會寧願自己冇出現過係呢個世上，其實我知道作為一個獨子，變成一個毒撚父母會係幾咁失望，最慘既係隔離屋同我由細識到大，細我兩年既嗰個仆街竟然成左才，廿五歲已經娶左個好老婆，今年（講緊我三十歲既時候）仲準備生埋個女添。而我同我既父母都只有恨既份，係我唔爭氣，個一年，我突然有想死既念頭，而且愈來愈強烈。

遊客，如果您要查看本帖隱藏內容請回復

Homan

正當我每日都係度諗緊點死法既時候，神奇既事就發生喇…..果排每晚我都會發同一個夢，夢裡面我去到一個洞穴之中，每次發夢我都會聽到一把聲音，聲音所講既內容隨住每次夢境既加長就愈清楚，佢想傳達既大概係話我係一個被選中既可憐人，叫我參與一個重生計劃，俾多次做人既機會我咁話。

講到呢到我自己都覺得無稽，但事實係有一晚我係夢中真真正正見到同我講野既嗰個人，佢著一套白色既套裝，冇錯佢係一個女人，仲幾靚添，佢用一把前所未有咁溫柔既聲音同我講：「你終於都黎左喇」。講真自從做左毒撚之後，除左睇ＡＶ我已經冇任何途徑接觸女人，今日先發現原來女人唔呻吟聲音都可以咁美妙，仲要係對我充滿左期待，我真係差ｄ就把持唔住想擒上去，但我及時醒起呢個係一個夢，於是我忍住冇狗衝，姑且聽下你講咩。

「你對我地既計劃有冇ｄ咩唔明白？」女人溫柔地問。
「計劃？」我心諗。
「係呀，就係之前係你夢中提及過既嗰個重生計劃。」
重生計劃？呀咪住，我岩岩先好似冇講野架喎，莫非呢個真係仙女？好彩我頭先冇狗衝到上去擒呀仙女，唔係我怕依家唔係參加計劃，而係直接跌入十八層地獄。
「係唔係對我地個計劃有ｄ疑惑呢？不如等我依家慢慢講解返俾你聽丫！其實我地係專門搵一ｄ對生存已經冇晒希望既可憐人參加計劃，計劃係我地可以提供一個重生既機會，俾佢地選擇三個自己想要既人生條件，然後再次投胎重新做人，希望可以令佢地重拾對生命既熱誠，展開一個更美好既人生。」
「三個想要既條件？即係我想下一世係點，你都可以滿足我？」
「冇錯！只要係合理既，我地就可以滿足你。」
「即係如果我要求自己下世好有錢，你就會俾我含住金鎖匙出世？」
「冇錯！」
嘩！唔係咁荀呀嘛？！可以重生仲可以自己揀人生？咁正點會唔參加呀？！諗到呢度我第一個念頭係下一世我一定要有錢！我要威過隔離屋個仆街！我要靚仔！我要溝死女！我要………咪住先，冇理由有咁大隻蛤蟆隨街跳既，莫非有ｄ咩陰謀？！都係問清楚先！

Homan

「真係可以我想點都得？如果我參加，咁要ｄ咩條件先？」
「真係你想點都得，條件你已經符合左，就係你對生命已經冇晒希望」女人面帶微笑咁講。
聽住佢用好輕鬆既語氣去講呢句說話，心裡面突然有一種難過。原來我俾人選中，係因為我對自己既生命已經冇留戀，我真係咁想死？我真係咁冇價值？我………我突然覺得自己真係好冇用，竟然要人可憐自己去俾自己重生，冇用到我真係希望自己已經死左，冇機會遇到呢一切………喂！咁既然都係死，點解唔選擇重生先？諗落有著數喎！點講自己都有ｄ生意頭腦，有得做點解唔做？既然有三個條件，我大可以加以利用令自己下世條命生得好ｄ，好！我就搏你一鋪！
「好！我參加！我希望我下一世做有錢人，靚仔仲要溝死女！」
「你決定左喇嘛？呢三個條件都冇問題，可以立即去投胎架喇，你準備好未？」
喂喂喂唔係咁快呀嘛？諗諗下自己有ｄ不智喎，靚仔自然都溝死女架啦！做咩浪費左一個條件？我要改！改做大ｊ！！！又有錢又靚仔又大ｊ仲唔殺死人？但唔係喎，依家ｄ女又好睇學歷，做博士好似好ｄ喎…..呀唔係，萬一短命又點算呀？咁幾有錢都冇用啦都冇命享。喂一出世就有錢會唔會俾人標參架？萬一撕票我又係死，咁點算先？要錢定要命呀？點揀好呀？唔係喇，唔好要咁靚仔，唔好咁有錢，要埋長命咁實冇死啦！
「唔係唔係！我依家決定要少少有錢，少少靚仔同最緊要長命！」
「決定喇嘛？係就依家跟我走喇，岩岩有個荀盤好符合你要既條件，依家唔投可能要等好耐架喇！」
「好！起行！」我滿心歡喜咁準備開展我另一個美好人生。

說時遲那時快，話音未落女人已經帶住我用極快既速度行走，好刺激！唔知係唔係人死前真係會有flashback，係女人帶緊我去投胎既同時，我竟然睇到自己既童年………望住自己同父母一齊玩樂，嘴角不其然揚起一絲微笑。
係喎！我投左胎咁我呀爸呀媽點算呀？時間未足夠我細想，我同女人已經去到一道門前。女人輕輕咁推開度門
「你可以入去喇，Have a nice life！」
我呆住係門前，突然想問佢一個問題
「如果我死左，我父母會點呀……」
「係你決定要死既一刻，其實你已經知道你既父母會傷心，呢個係你既選擇」女人依然帶住一個好美麗既微笑，但美麗得有點刺眼。
呢一刻我突然覺得對唔住我既父母，生左我出黎三十年，我荒廢左一半既光陰，如今我為左自己一己私慾，忘記左兩個老人家會傷心，係呀佢地係老人家，計起上黎佢地都已經六十有八，我真係一個不孝子，要佢地白頭人送黑頭人。
「我想改條件」突然間我有所覺悟。
「我希望自己下一世可以做一個健康既人，唔洗好有錢唔好太靚仔，我要有自己既成就，最重要係我希望我有機會同我今世既父母重逢，希望我可以用另一個身份去睇下佢地」
女人唔知係唔係俾我突然間既改變嚇到呆左，碌大隻眼望住我，幾秒後先回一回神
「如果係咁，你就要入隔離度門喇」女人回復返佢專業既笑容，起手一揚指住旁邊既一度木門
我望一望佢，然後踏步去到木門前，輕輕推開準備行入去。女人突然叫住我
「呀！先生，我想同你講你係我第一個客人，我衷心希望你有一個美好既人生！」
我望住佢面上好由衷既笑容，不其然開始期待自己黎緊既命運，臨入門口前我做左我呢一生人最大膽既事
「係呢小姐，請問你叫咩名呀？」
「我叫芷瑤，祝你旅途愉快！」
「我好高興….…….」
突然有一股吸力將我吸入門內，然後眼前一白，我開始失去意識，我諗我既新生命要開始喇。

Homan

邊個打我蘿柚？！

難得瞓得咁甜仲要夢見個靚女，邊條粉腸打醒我？？？
「醫生，BB只係呀左一聲，依家合埋左雙眼好似冇左呼吸，係唔係要急救呀？」
咩呀？！BB？冇呼吸？發生咩事？
係呢個咁疑惑既時間，又係時候黎一個flashback。時空好似突然倒退，被一束白光吞噬，然後我又見到夢中同仙女芷瑤相遇既情況，仲醒起自己參加左個重生計劃添！
喂唔係夢黎架喎！我難掩心中既興奮，好想立即睜開雙眼睇下自己身處係咩境況
當我慢慢睜開雙眼之後，發現面前有一對好明亮既眼睛望住我，呢個就係頭先打我蘿柚個小護士
「醫生，BB有返反應喇！」個護士語帶興奮咁大聲宣佈
而我亦都正正式式呼吸左我第一啖空氣，然後就俾護士帶我去清潔，當護士放左我係BB床上面，我先真正意識到原來琴日唔係一個夢，我真係重生喇！
望住護士有Ｄ模糊既面孔，我有少少高興，因為就憑頭先望佢嗰雙水汪汪的大眼睛，我可以肯定佢係一個美女，一出世就已經咁有艷福，睇黎今世應該真係唔錯呀下！
咪住先！作為一個BB，我係唔係應該放聲大哭緊，而唔係咁 目及 緊女呢？雖然我上一世真係冇咁既機會係咁近距離去親近一個美女，係好應該享受下呢個咁親密既時光。講真真係享受黎，試想像下佢好溫柔咁同你抹身，係全身，俾著未投胎前既我已經扯到不行了！等陣！我個咕咕呢？？？？？
仆街萬一今世唔係仔，我仲點溝死女呀？我上世個處已經悲哀到要留返下世破，我唔想今世都冇享受既機會呀！於事我不停伸手想摸下自己下身，喂！點解BB　Ｄ手腳咁難控制架？我摸唔到我咕咕呀！！我要咕咕呀！俾返個咕咕我呀！！！
係我準備絕望既同時，小護士已經幫我清潔好身體，抱起左我行到去病床前
「恭喜晒呀，仔仔好活潑好好動呀！」
呼！原來我有咕咕既！芷瑤果然辦到事呀下！
正當我自己暗地裡高興既時候，更重要既事情發生喇，我要見我既二世父母，我有ｄ緊張，一切既謎底係護士放我係媽媽臂彎既同時解開左一半，我媽媽絕對係一個靚人妻！我仲憑我同媽媽既身體接觸，第一次感覺到女性身體既柔軟，嗚呀！
「老公，仔仔眼仔碌碌咁好趣緻呀！」睇黎我老豆要出現喇！
呢個時候有個著住防菌衣既男人行左埋黎，仲哄到個死人頭鬼咁埋去睇我個慈咕定！一望呢個男人就注定左我同佢有仇，因為係我靚媽媽抱住既時候我已經決定左，除非我要戒奶，否則我堅持食人奶食到小學畢業！！！！

Homan

出左世之後，我第一件事就係為我既人生作一個周詳既計劃。諗諗下呢個重生計劃堅係著數，因為除左個身體唔同左，我既思想同智慧可以話係停留係上一世，咁即係話我可以選擇做一個天才兒童！
而係我瞓係BB床上冇野做既同時，我係做左幾個測試
一　測試自己既語言能力－我分別用左不同既喊聲去測試，結論係我既語言能力依然存在，但有睇過西遊記既巴打都會知道一出世如果識講野，下場應該只有死。有豬八戒呢個咁典型既例子，我同自己講等到六個月先好開口講第一句說話，所以依家呢個時期係好考我既忍耐力

二　身體活動能力－我嘗試轉身、摺埋自己同經常性摸咕咕，但發現自己身體既機能未有咁發達住，可能岩岩出世ｄ筋骨係比較柔軟難控制，唯有等下啦。至於摸咕咕純粹係因為開心見返佢，失而復得既感覺係會令你情難自禁想係咁摸住佢。

三　嘗試同其他BB溝通－結論係其他BB除左食奶，其他時間都係睡眠狀況，間唔中會叫兩聲，而作為一個BB既我，我係聽唔明佢地講咩既，估唔到重生之後代溝依然存在。

BB既生活真係好悶，唔係食就係瞓，而我亦都好期待第一次食奶
冇錯，我靚媽媽真係好好奶水，我仲好記得第一次護士抱我埋去食奶，媽媽對奶
詳情都冇咩特別，BB可以做得Ｄ咩丫？但嗰一次係我兩世以來最滿足既一次，因為既有視覺享受，又可以滿足口腹之慾，而個女人仲要笑得好開心咁任你啜，呀！我冇後悔重生，多謝芷瑤！！！

留院過後，我既二世父母終於帶我返屋企，返新家既途中我堅持要呀媽抱，佢一放低我就喊，而我亦都明白點解Ｄ　BB成日扭計要呀媽抱，眼淚的確係一樣好凶狠既武器。
返到屋企，嗯！都算唔錯，中上既家庭，而且我係獨子，暫時可以話係萬千寵愛在一身。但係我真係好唔想對住我老豆，一望到佢個樣，我只可以形容為猥瑣，不過我明既，我又冇要求我老豆要靚仔，怕係怕自己大個同佢似樣，都係似靚媽媽好！
靚媽媽依家係我既一切，每當我發出任何聲音，佢都會飛撲埋黎睇我，而我亦都會出盡飲奶既力喊到佢抱起我為止
但有件事令我好不滿，就係每日我老豆放工返黎就要痴住我，就連每次我食奶都要睇到實，每次都用ｄ好淫褻既眼神望住佢老婆，然後望住我笑！我不滿！呢個係我同靚媽媽既美好時光，點解要你呢個猥瑣老豆係度阻住晒！！我要宣示我既佔有權！於是每次佢睇住我食奶，我就用力啜住一邊，用隻小手禁住一邊黎話俾佢知你老婆對奶依家係我架，你摺埋一二邊恨下啦！

Homan

雖然依家每一日都係靚媽媽既溫柔愛護同巨奶下生活，都可算係生活樂無邊。但我重申一次BB既生活真係好撚悶，每日唔係食奶就係瞓教，而我媽媽亦都唔係成日可以陪住我，有時都係由得我自己係床度fing手fing腳，仲要買到成床都係低ｂ公仔驚焗我唔死，唔係喇，我重生既目的唔係咁既，係時候真真正正計劃下喇。
一開始話要自己做天才兒童，咁講真其實自己一直讀書都唔係差既，只係中三嗰年因為俾女神拒絕左所以先無心向學，何況小學野有幾難搞，所以如無意外小學到初中都可以以天才兒童既身份跳升，不過到中四五既科目就難搞ｄ，呢個真係要諗下辦法。

至於溝女方面，毛都未出齊又真係好似言之過早，不過我已經決定左無論如何都要搵返個青梅竹馬，細細個就開始培養感情，諗到就覺得爽！不過真係要睇定ｄ，因為好多細個得得意意既大個都變晒樣。我既一世父母都要搵，不過爬都未爬到就莫講搵人啦，的確係有ｄ不自量力，所以我要將呢個目標押後幾年，到我有能力可以自由活動我就會確切執行！而我知道如果我要做一個有計劃既人，絕對係應該係嬰兒時期就開始儲錢，有錢黎緊就好辦事。黎緊可以搵錢既機會就係滿月，只要我嗰日出賣自己少少笑容，應該可以換黎一堆利是同金飾，希望猥瑣老豆唔好中飽私囊吞晒我ｄ肉金。

係我諗緊我美滿人生計劃既同時，我靚媽媽同猥瑣老豆就企左係我床邊望住我
「BB～我係爸爸呀！」diu你男人老狗就唔好吊高八度黎講野啦，知唔知聽嗰個好辛苦架？
「呀～BU～」fucku
「哎呀老公～BB愈來愈似你喇！」
「呀～呀～BU~」吊！唔撚係呀嘛？？？我唔要猥瑣呀
「個仔就似我，不如我地生多個女，今次要似你既」一路講一路隻豬手已經摸緊靚媽媽個圓滑屁股
「呀！呀！MA！」縮開你隻臭手呀！靚媽媽月都未坐完你就色心起！我唔要呀妹呀！分薄晒我既利益！喂你個麻甩佬理下你個仔感受好喎，我知你做緊咩架喎！唔係唔可以暴露我既身份，我一早已經問候左呀 女麻 喇！喂！仲唔停下話？！係你迫我架！我要出絕招喇！

「哇～哇～哇……..」
「老公等等先啦，BB喊緊呀」靚媽媽都係你好，過黎抱我啦
「哇～哇～呀~BU~」我贏左喇！你死心啦猥瑣老豆！
如是者呢一晚，我、靚媽媽同猥瑣老豆都冇瞓過

Homan

事實話俾你知眼淚攻擊用唔得好耐，雖然我係一個超班BB，但始終都係BB，體力有限，每晚咁喊法除左令我既父母麻木晒之外，我亦都因為消耗體力而未能成功阻止猥瑣老豆攻城，我既喊聲呼籲唔到佢戴套，於是係我五個月既時候，屋企又準備多一個新成員。
至於我既人生暫時都係按我既計劃去行事
六個月既時候我講左第一句說話－「我想食拉麵」
八個月已經識行識走
二歲係牆上面寫左句　I Love You Mama
三歲我就已經升讀左一年級
之後既日子我就係學校賣下文具搵錢，五歲嗰年連埋滿月同每年新年既利是錢我已經儲左差不多兩萬蚊
呀！唔記得講，係我歲半既時候多左個呀妹，非常咁痴身！不過見佢都幾可愛，只要佢唔迫我陪佢玩洋娃娃我都唔會理佢。

因為我讀書跳級既關係，我既同學多數都大過我，個個都當我係小學雞，基本上我只有幾個朋友，都莫講話溝女。
而我尋找一世父母的目標亦係今年開始，雖然我只有五歲，但憑著我三十五年既人生經驗，要自己去搵人其實一ｄ都唔難，不過安全至上，呢個時候我既朋友要出場喇！佢叫偉力，五年級生，生得都幾高大，體格唔錯，當年因為我教佢做功課，佢答應做我既好朋友，其實我係想帶埋佢同我一齊搵人就真。
要搵我一世父母既第一步，就係去返我以前住既地方，希望佢地冇搬到屋啦…………

Homan

呢個星期返學時我同偉力商量左星期六一齊返去我以前住既地，理由都冇問偉力已經應承左，無他既，自從我教佢做功課令佢成績有少少進步之後，佢已經當左我神咁拜，講落應該收返佢補習費。

約會落實之後，我既心情變得沉重，有ｄ不知所措。五年，變數真係好多，如果…..佢地已經搬左，又如果佢地已經唔係度……….計落佢地依家應該七十有三，呢五年只有佢地兩個老人家，生活會係點？愈諗我就愈覺得自己不孝，依家只希望佢地仍然安好。

返到屋企，心情仍然未平伏，望到呀妹將個廳佈置到好似Barbie專用咁，我只可以搖一搖頭，然後決定發洩一下，於是我走埋去同呀妹講
「妹妹你今日返學乖唔乖呀？」嘩….真係假到呢
「乖！」好天真
「乖既有獎勵，你知唔知道daddy為左獎勵你買左好多糖俾你食，不過要食完飯先可以食糖， daddy將ｄ糖放左係床頭隔離個櫃第二格，你可以去揀定一粒你最想食既，乖！依家去揀，唔好話俾人知呀！」
「好野！」好瀾漫

晚飯既時候，妹妹滔滔不絕咁講今日係學校發生左咩事，包括佢排隊排第一，食茶點食最快，玩完有幫手執玩具等等等等
「Daddy我咁乖可唔可以食糖呀？」妹妹滿心歡喜
「當然可以啦！但係唔可以食咁多」依然係嗰個猥褻既笑容，同淫賤既瞇瞇眼
「好野！」說罷妹妹立即跑離飯檯，三步拼作兩步走去攞糖
而我就從容不迫咁飲埋碗湯
「Daddy我要食呢粒！幫我開！」只見妹妹用期待既眼神望住猥瑣老豆，並高舉手上拎住既係一個紅色既正方形小包裝
猥瑣老豆既笑容一下子彊住，而我則輕描淡寫咁挌下一句「我入房做功課」就私私然咁走返入房
士多啤梨味，呀妹果然有眼光

星期六，十點
偉力好準時係地鐵站同我會合
搭車期間腦海閃過太多既念頭，唔諗喇，船到橋頭自然直
到達目的地之後，發現自己除左知道以前住過既大廈名之外，其他根本都未見過！甚至唔知道屋企樓下多左一個咁熱鬧既街市，一個好有生氣既休憩公園……….梗係啦，之從中三之後我基本上已經冇理過身邊既事物，上一世抱住既係事不關己既心態，只要佢唔搞到我，我都可以當冇事發生。
係回想上世既同時，不知不覺已經行到去舊居，係對面街佻望我住左三十年既大廈，我竟然講唔出佢到底有冇改變過。
大廈既入口加建左一道鐵閘，我同偉力企係門口諗緊點樣入去既時候，我見到一個熟悉既輪廓。
佢好似瘦左好多，頭髮亦都稀疏左，從前既黑髮被年月吞食，始終都已經七十三歲，老態盡現，欣慰既係佢望落都算幾健康，彎住個背踏住小碎步步出鐵閘，面上好似掛住一絲笑容。
望住佢，我感覺身邊既空氣突然靜止，直到一滴小水點劃破沉默。
我……..我突然詞窮，心裡面湧入一大堆後悔、內疚與自責。原來我媽媽已經老喇，呢五年地究竟係點樣支撐自己既生活，又點樣平伏喪子之痛……….自私既我選擇拋低佢地重新開始，而佢地就要承受生離死別既痛苦，一世媽媽懷胎十月生左我出黎，或者唔寄望我做一個有成就既人，但一定唔希望我放棄自己，而我在世三十年不單冇好好對待佢地，回饋佢地既只有傷悲，我係一個切切實實既不孝子。
記得重生當晚芷瑤講過，話我既然選擇左重生，就預左我父母會傷心，依家我想問自己，當日既決定是對？還是錯？

Homan

望住一世媽媽既背影，心裡面真係隱隱痛，暫且平伏一下心情，調轉頭諗佢依然健在都唔係一件壞事，咁我一世老豆呢？唔得喇，一定要諗一個方法用我依家呢個身份接近佢地，了解下佢地呢幾年究竟點過，多多少少都做返ｄ野，當係補償或者令自己冇咁內疚都好啦。

「婆婆！」一把清脆響亮既女聲打斷左我既思緒
只見眼前一個小女孩急步奔向一世媽媽，面上充滿笑容，張開雙手撲入媽媽既懷抱之中。
婆婆？呢件事根本冇可能發生！當年家中只有我一個獨子，而且親戚亦都唔多，睇個女仔同我差唔多大，我完全唔明白呢個孫女可以係邊度走出黎

「婆婆，我地搵左位喇！我要請你食蝦蛟！」女孩笑住同一世媽媽講，露出一排潔白既笑容，媽媽亦都回應左一個由心而發既笑容，呢個畫面吸引左我既目光。同呀媽「相處」左三十年都未請過佢食野，自己既言行亦都只有令佢失望，我諗我令佢由衷咁笑都應該只有幼稚園畢業表演既時候因為扮龍蝦搽到塊面紅晒，最慘係ｄ顏料竟然洗左三日先甩得晒，果幾日一世呀媽望住我係好真心咁恥笑，真係講出黎都慚愧。

女孩拖住一世媽媽轉身行去酒樓，我亦都唔輸蝕
「偉力！你都肚餓架喇，我請你飲茶」我就死跟睇下你究竟係咩料！

跟到去酒樓開左個位，偉力呢個大食積已經咩都唔理叫點心，我就就岩個角度睇清楚個妹釘同我呀媽搞乜東東。
呢個妹釘好殷勤，又“針”茶又遞水咁，服侍得我呀媽都唔錯，不過真係諗極都諗唔明佢同呀媽係咩關係，叫佢婆婆又未必係親戚，但佢地又真係好似好親密咁，究竟呢個妹釘係咩人呢？

謎底好快就解開左，因為又有一個熟悉既面孔出現，唔知大家有冇留意到我一開始講話我有個細我兩年，由細識到大既隔離屋，佢岩岩出現左係酒樓，仲坐左落妹釘張檯，而我隱約聽到個妹釘叫左一聲爸爸！
哦！我完全明白喇！五年前佢老婆大左肚準備生，呢個妹釘就係佢個女！講起呢個男人，真係火都黎埋，由細到大都蝦我，整爛我最鍾意既模型、擦走晒我ｄ功課、放我最鍾意既龜仔落咸水，最重要係佢搶走埋我女神！
想當年帶頭恥笑我送錯碟既就係佢，呢啖氣咁多年我都吞唔落！一諗起佢有個靚老婆，生左個咁得意既女我就嬲！就當我火上心頭既時候，第一個想法就係報仇！
望住佢地一檯人有講有笑，個妹釘又哄得我呀媽鬼咁開心，我真係好想知呢個人痴埋我呀媽度究竟有咩居心？
憤怒既同時，邪惡既念頭就會產生。望住妹釘，佢可算盡得佢呀媽既真傳，清清秀秀，笑起上黎好吸引人，呀媽咁靚，個女大左應該都唔會差既！就算樣衰，咁未飛囉！雖然話就話上一代既恩怨唔應該影響到下一代，但我依家都係人地既下一代，咁即係唔成立啦！
既然上一世你搶左我女神，要我受情傷，今世…...呢個仇就搵你個女黎償！

好呀！前世父母已經搵到，溝女既目標都已經有，一個星期六就完成左兩個目標仲加多個bonus，完美！

Homan

既然已經有一個定案，係時候搵機會去實行。
飲完茶我同偉力繼續跟，佢地由茶樓一路行行到去附近一個商場，之後三個人一齊入左一間琴行，冇幾耐兩個大人行返出黎，我諗妹釘應該係入面上堂，於是我叫偉力係外面等，我自己走入去
「請問岩岩先我表妹入左邊個班房呀？」我用一個好天真無邪既語調去問
「表妹？小弟弟你入黎做咩事呀？」小弟弟……麻煩你對住我褲浪講
「岩岩先紅色衫拎住黃色袋既係我表妹，我應該要同佢一齊上堂但係我唔知係邊度上呀！」扁一扁嘴，增加可愛同無辜既感覺
「咁你有冇學費紙呀？我幫你睇下啦」
「我…..我….我唔知呀，媽咪冇講…….」眼角帶少少淚光，水汪汪咁望住姐姐
「哦～唔緊要唔緊要，我帶你入去睇下你表妹係邊先好唔好？」你睇你睇你睇！女人係抗拒唔到小朋友魔力既生物

去一個班房，發現目標人物！妹釘好專注咁畫緊畫
「小弟弟，你睇下你表妹係邊度？」
「唉？！點解冇既？」目標人物已經搵到，係時候撤退
「你搵真ｄ丫！」
「冇呀……我表妹唔係度呀……」辦已事，散水！
之後姐姐好好人咁幫我問多兩次，冇人回應就帶返我出去接待處，我一路低頭扮傷心，姐姐就一路安慰我。
要接近妹釘最快既方法就係同佢一齊上堂
「姐姐呀！我好想學畫畫呀，我可唔可以入去同佢地一齊上堂呀？」繼續水汪汪眼睛攻擊
「可以，但係要有錢錢喎」疊字……麻煩對住我褲浪講
「錢呀，我有呀！」錢可以解決既問題唔係問題！
然後我就係我個小褲袋度拎出小銀包，再夾出一張摺左三次既一千蚊
「拿！錢！」天真無邪快樂活潑得意可愛樣
姐姐見到張一千蚊呆左，挑！如果唔係未夠十八歲，我想簽卡添呀，快手啦！

當然一個小朋友係冇可能辦到手續去上堂，最後我都係失敗左。不過係走之前我係咁同姐姐講我想上堂，叫佢死都留返個位俾我，出動到眼淚鼻涕lur地拉衫之後，姐姐好無奈咁答應左，而我亦都同偉力回程返屋企。

回想返今日既經過，我發現我好需要母愛。
「返黎喇？今日同同學仔去街好唔好玩呀？」靚媽媽真係關心我
而我亦都唔輸蝕，立即飛奔入靚媽媽懷抱，巨奶，你有冇掛住我？
「媽媽我好掛住你！」

一世媽媽，你聽到嗎？

要接近妹釘，首先要做既就係打開話題匣子，作為一個有十幾年歷史既毒撚，仲要同個五歲既妹釘講野，我真係諗唔到應該講ｄ咩。Hello mimi？Barbie？米妮老鼠定白雪公主？完全冇概念………..
好彩！我有救兵！我諗三歲半同五歲玩既野應該差唔多架姐。於是我係準備上畫班既前一晚邀請左我可愛既妹妹入我房，一齊商討下時下女童最喜愛既玩具係咩
「妹妹呀，你最鍾意玩ｄ咩架？」
「我最鍾意同媽咪玩！」嗯…….要有耐性…要有耐性…
「唔係呀，你最鍾意玩咩玩具呀？」
「Olivia！我最鍾意同佢出街」……我記得佢有舊物體叫Olivia，但唔記得左係咩玩具…….
「Olivia係咩黎玩具架？Barbie？」
「Olivia係我朋友！」我輸…………………
結論係同一個三歲半既小朋友講野，絕對係忍耐力既挑戰！
妹妹好熱心咁同我介紹佢個朋友，而我就準備絕望。
係妹妹lur緊我同佢朋友玩既時候，我聽到ｄ…..聲，雖然音量唔大，但都傳到過黎我既房間。聽到之後我十分無奈，我已經諗唔到點同妹釘溝通，你地仲要發出ｄ咁既聲音即係想我唔洗瞓啦？！雖然我呢個五歲身體未能夠作出反應，但三十五歲既腦袋絕對會胡思亂想，最重要係猥瑣老豆污染我個靚媽媽就唔得！
「噓噓….妹妹…. 你聽唔聽到呀？」我細聲同妹妹講
「下？」妹妹碌大對眼望住我
「媽咪呀….」同時舉起手指放埋嘴邊示意妹妹唔好出聲
「媽咪可能唔舒服，我地出去睇下，不過你唔可以發出任何聲音！」
之後妹妹用力點一點頭，同時用手掩住自己個口，然後跟住我放輕腳步咁行到去主人房門前，我輕輕打開一條門縫，望到男上女下既情景，本來諗住等呀妹入去搞破壞，點知我都未講野，佢已經哇一聲喊左出黎
「哇…..哇…..」我決定留低呀妹，自己置身事外，返房
「哇…….爸爸好衰呀！哇……..」英雄所見略同
係妹妹喊緊既同時，主人房中既微弱呼叫聲停止，取而代之既係急步聲同溫柔既慰問。

後來妹妹講返，原來佢早兩日睇電視見到兩隻動物打交，當晚就以為爸爸擒住媽媽黎打，事後仲嬲左猥瑣老豆幾日。
所以話呢，想搞野又唔鎖門，出事架嘛！

Homan

既然求助無門，唯有靠自己，我決定黎一個大包圍，咩蝦毛kitty定米妮老味我都做個深入既research，慕求聽日妹釘講咩我都搭到嘴。
到達畫班，目標人物亦都一早坐定，於是我一個箭步走埋去妹釘隔離坐低。
妹釘低住頭係佢個袋度拎緊顏色筆同畫簿出黎，而意想不到既係除左呢ｄ工具，佢最後係畫袋度拎左一架雙層巴士出黎，放係佢既正前方。
「點解你要放架巴士係度既？」我衝口而出問左一個我冇準備過既問題
「因為我鍾意巴士」妹釘望左我一眼，好平淡咁回答我
妖…….咁我琴日準備左成晚為咩………..不過都好，巴士係我拿手既項目，話晒上一世都做左唔少研究，應該可以應付到。
「你第一日黎上堂？」妹釘問
「係呀，我……er……..」死喇….唔知講咩添……
「你有冇帶顏色筆呀？」
「er……冇喎」正一低b仔
「咁畫簿呢？」
「都冇………..」咁你黎上咩堂呀傻仔
當我暗自鬧緊自己有幾蠢既時候，估唔到又傻人有傻福喎！
「咁我借住俾你先啦，下堂記得帶喇」說罷妹釘係佢撕下一張畫紙，再將佢既顏色筆推到我倆既中間。
呢一刻竟然有少少感動，從來冇一個女仔對我咁好，願意咁溫柔咁對待我，因為以往我所見過既唔係恥笑我就係留難我。不過我唔可以為左呢ｄ小事而壞左大事，我要記住我既目的係接近佢，再藉住佢親近我既一世父母，之後再玩弄佢，佢只係一舊踏腳石，一隻棋子。

係上堂既期間我地有傾有講，妹釘俾我既感覺係比同齡既女孩子成熟，好識得照顧人，而且佢既喜好同其他女仔唔同，試問我點會估到一個五歲既女仔會鍾意巴士得架？！我突然間覺得妹釘好特別，好奇心令我想了解佢更多。而我亦都估唔到就係因為佢借野俾我，又因為我對巴士十分熟悉，所以就好輕易咁做左朋友，事件既發展俾想像中順利。

就係我地畫完畫之後，妹釘將畫紙反轉為張畫署名，只見佢用生硬既筆跡寫下「阮子榣」三個字。望到佢個名，心頭突然泛起一陣漣漪，我隱約咁感覺到，妹釘同我將會有一段不解之緣。

著幾個星期六既相處，我已經成功取得妹釘既信任，每次去畫班，妹釘都會預留個位俾我，而且會帶一ｄ佢鍾意既巴士模型返黎俾我睇，而我就會同佢講解有關巴士既特性，妹釘每次都聽得津津有味，我都好樂意有個好聽眾。

我亦逐漸融入佢既生活，每次放學既時候，唔係佢爸爸湊佢走，就係婆婆，亦即係我既一世媽媽，佢地開始知道我既存在。有ｄ興幸可以識到妹釘，等我有機會時不時見到我既媽媽，知道佢開心快樂，有時都會黯然神傷，因為每次我都希望一世媽媽拖住既係我而唔係妹釘。

有一晚，我收到妹釘電話，內容大概係佢想約我下次放學去佢屋企玩，話買左架新巴士想俾我睇下。估唔到事情進展得咁快！我都未開聲約妹釘，佢已經採取行動，難得有機會冇理由唔把握，趁呢個機會打探下就最好不過，其實除左打探，其實我都好開心妹釘主動約我

當日畫班完左之後，妹釘好雀躍咁拖住我出班房，感覺………唔識形容。企係妹釘屋企前面等開門既時候，我望左一望隔離個單位，即係我既舊居，心理面突然有ｄ唔自在，其實世界上最遙遠既距離唔一定係兩個人相愛但唔可以係埋一齊，有時想接觸但觸不到既感覺仲辛苦。
入到妹釘屋企，見到惜日女神，如今已為人母，出奇既係見返佢但係我冇太大既感覺，反而見到佢望住個女既滿足樣，我真心覺得佢幸福。
妹釘好踴躍咁同我介紹佢ｄ巴士，而我個心就去左佢隔離屋。
「呀！我有架巴士留左係婆婆屋企，我過去拎返先！」
「我可唔可以同你一齊過去？」我衝口而出
「可以呀，婆婆好好人架！」說罷妹釘去通知女神一聲，就示意我同佢一齊過去

心情有ｄ忐忑，唔知屋企變成點？唔知今日有冇機會見到我老豆？唔知一世媽媽會點樣招呼我？一聲開門聲將我從胡思亂想中喚回，一世媽媽開門
「子榣，你過黎探婆婆？」
「係呀，我過黎拎返架巴士，婆婆呀，呢個係我畫班既朋友，佢叫何光浩」
「婆婆你好」婆婆…..講完我都忍唔住恥笑自己
「光浩呀，你好你好，入黎坐下啦」婆婆用有善既語氣邀請我入屋
入到屋妹釘一支箭咁衝左入房搵巴士，我就企係離開左五年既大廳度，沉默無語。

Homan

企係呢個接觸左三十年但又離開左五年既大廳，感覺既熟悉又陌生，屋裡面既格局冇咩轉變，相反變得有點簡陋。
飯檯旁邊依然放住四張木椅，其中一張木椅背上有一條刮痕，係我細個貪玩刮花，估唔到保留到依家。飯檯旁邊既書櫃換左，入面放住我細個贏返黎既一ｄ獎盃獎座，同幾件我細時好鍾意既玩具。
梳化既擺位冇變，前面既小茶几依然放住一盒面紙，幾本疊好既雜誌。電視旁邊放住幾張相，係我細時同兩老影既家庭照。
唯一既轉變係電視牆上一個當眼位置掛住一張前世既我既大頭相，仲有一張與我並行而列既，屬於我老豆既黑白照。

我望住牆上既兩張照片，鼻頭突然有點酸，我拚命睜開雙眼，因為我知道一眨眼，眼淚就會唔爭氣地跌落……….
直到妹釘拍一拍我先回神，望住妹釘手上既巴士，突然百般滋味在心頭。點解我會對巴士有興趣，唔多唔少係因為我老豆。佢係一個巴士司機，記得幼稚園既時候，老豆會黎接我放學，有時因為工作關係仲著住制服，我覺得好型。果時我覺得我老豆係呢個世界上最叻既人。當每個小朋友都話要做醫生律師警察既時候，我立志同老豆一樣做巴士司機，要同佢著同一套制服。
每個星期我都會lur老豆同我去睇巴士，老豆每次都會抱住我企係街邊，望住經過既巴士，同我介紹每一架既特性，直到我肚餓扭計要走，否則無論我老豆抱住我有幾辛苦都好，佢都會繼續講落去。冇諗過大個之後，我不但冇做到細個講過既承諾，甚至冇陪住佢離開人世，估唔到我只能係咁既環境陪伴佢一世，我唔可以原諒自己。

雖然妹釘好熱情咁講佢ｄ巴士，不過我已經冇晒心情，於是是但搵個藉口同佢講我要返屋企。歸家途中我腦海中只有一句說話

樹欲靜而風不息，子欲養而…………

Homan

呢一晚，我既腦海裡面有好多掙扎。
我又再一次問自己究竟選擇重生係岩定錯？究竟一世老豆係點死？一世媽媽又如何捱過呢五年？
愈諗我就愈憎自己，本來作為兒子，好應該供養父母，要佢地下半世安安樂樂咁過。依家白頭人送黑頭人不單止，仲要送走自己最愛既另一半，剩返自己一個留低係充滿回憶既舊屋之中，果種心情……我想像唔到。
或者調返轉諗，一個孤獨人要死係逃避，一個孤獨人唔死係勇氣，一世媽媽選擇左面對呢ｄ厄運，其實佢真係好堅強。
我冇再諗咩補償唔補償，因為我知道一個五歲，同佢只有幾面之緣既小朋友，就算哄得佢幾開心，始終修補唔到佢心入面既傷口，而因為我既身份已經唔係佢個仔，我亦冇資格講補償，呢個只係我安慰自己既藉口。

接著既幾晚都瞓得唔太好，突然有晚又接到妹釘既來電，佢約我星期六飲茶飲完再一齊上堂咁話。係電話旁邊，我諗左好耐，俾著如果係一個星期前妹釘約我，我二話不說一定會答應，今日有遲疑係因為我唔知自己再去接近一世媽媽係好事定壞事，接近佢，俾我知道佢有幾辛酸，相信只會令我更罪疚，何況我又可以做到ｄ乜？不過到最後我都係答應左，可以再次同佢同檯食飯可能會係我呢世人唯一一次亦都係最後一次，如果可以既話，為一世媽媽夾一粒蝦蛟，又或者倒一杯茶，已經係我呢生最大既福氣。

星期六，酒樓門外
我瑟縮於酒樓既一角，等待妹釘同其他人既到來。
原來一個五歲小朋友既視野真係好狹窄，我左望右望見到既都只有熙來攘往既身影，遠處既景物一概不見。
「光浩～呀你係呀子榣個同學仔！咁早黎左既？」熟悉既聲音又傳到我耳邊，可惜，呼喚緊既唔係熟悉既名字。
「婆婆早晨」我又再一次唔爭氣
「我地上去等呀子榣好嘛？唔好係度迫喇一個小朋友」
應一世媽媽既意思，我地先上去搵位再等子榣。係人來人往既酒樓大堂中，一世媽媽似乎行得唔太穩，我深怕其他食客橫衝直撞碰跌我母親，於是我伸出小手拖住佢既大手
「我帶你行啦！」就等我呢個不孝子盡我能力去保護你！

坐下 沉默 無言
一張四人圓檯，只有我同一世媽媽，佢坐係我既旁邊，這麼近又那麼遠。手上既餘溫仍在，就連我靚媽媽拖我既感覺都冇咁實在。我手握住拳頭，好唔想俾呢種感覺溜走，然而自欺欺人係冇用，以前有咁多機會你唔去珍惜，依家先黎後悔實在太遲。
愈諗自己就愈傷心，呢段時間積聚落黎既悔疚、自責通通湧現，突然間有一種唔想再忍既感覺，我想喊！既然我依家寄居係一個五歲小朋友既身上，無原無顧當街大喊別人應該見怪不怪，我唔忍喇！我要釋放！
「哇！哇……」突如其來既喊聲驚動左一世媽媽
「哎呀～咩事呀？做咩喊呀？係唔係唔舒服呀？」佢輕撫我既後腦，而我繼續放聲大哭
「做咩事喊得咁淒涼？有咩唔開心同婆婆講」語氣中盡是溫柔，慈祥…..點解前世我感受唔到？
我繼續痛哭，開始吸引旁人既目光，正當我以為一世媽媽可能會因此而尷尬既時候，竟然有一雙大手輕輕將我抱起，慢慢放到大腿上
「做咩事呀浩仔？快ｄ同婆婆講」媽媽輕輕地吐出一句溫柔話語，但只令我哭得更凶……
「唔好喊啦～乖啦浩仔～乖乖收聲啦」媽媽抱住我，輕輕咁搖，好似哄一個初生嬰兒一樣
一世媽媽既溫柔觸動左我，我伏係佢既心口，聽住佢既心跳，感受佢既安撫，圍係佢頸上既雙手不其然收緊。我由媽媽既心口向上望，見到佢微微合上雙眼，咀邊掛住一絲微笑，再用溫柔既話語去安慰我

我喊　只係因為我想叫你一聲媽媽

Homan

自從上一次同一世媽媽短暫親密，我發現自己極度貪戀同佢相處既時間。或者係因為我從來冇用心去感受過呢份由始至終都屬於我既母愛，從頭到尾都唔知道原來一世媽媽係可以咁溫柔。上次之後我知道佢當左我好似佢孫仔咁錫，而我亦都唔想自己再次錯過同佢相處既機會，所以我決定用我呢個“孫仔”既身份去愛佢呢個媽媽，每個星期六我都會同佢飲茶，飲完茶就去佢屋企同佢傾下計，其間好想佢會講到關於佢個仔同佢老公既事，不過一直都冇提起，可能對佢黎講太傷，令佢逃避唔想講。
姑且唔提佢既舊事，我同佢既相處都真係好輕鬆好開心，有時加埋妹釘呢個開心果，氣氛仲會更加好添！見到一世媽媽開心，我都好滿足，總算叫做做左ｄ野，又可以陪住佢同佢分享開心快樂。
呢個關係一直維持左八年，我亦都介紹左佢俾我依家既父母認識，我既屋企人都好接受呢個老人家，甚至當佢係一份子咁看待，每逢大時大節都會預佢一份，呢八年雖然過得開心，但畢竟一世媽媽都已經八十一歲，我始終都有個隱憂，就係唔知佢會幾時離開我。

講返我自己，呢八年我冇再跳級，話就話自己可以以一個天才兒童既身份去讀書，但係中學既課程對我始終都有難度，而且難得遇到偉力呢個傻頭傻腦既好朋友，如果我再跳班，恐怕連呢個唯一可以交心既朋友都冇埋。所以我由五年班開始繼續順序升班，而我知道如果我唔努力，天才兒童呢個空殼終有一日會打破，所以我好努力讀書，雖然未至於幾十個Ａ，但最少都叫做好成績，於是係我十三歲既時候，我用資優生呢身份升讀大學。

而我既二世家庭冇咩特別，始終爸爸媽媽有ｄ家底，生活總算無憂。靚媽媽依家係咁溫柔賢淑，時間既流逝令佢更添女人味，佢絕對係一個令人自豪既媽媽。

猥瑣老豆依然係咁猥瑣，佢對於自己有一個十三歲既大學生兒子感到好驕傲，仲有意欲栽培我去接手佢既小生意，可惜我要令佢失望，因為我選擇左做社工，希望將來可以幫助到同我上世一樣既可憐人，雖然猥瑣老豆好想我改變想法，不過佢都尊重我意願，其實呢個老豆都算唔話得架喇。

至於我個天真可愛既妹妹就已經準備升中學，我知道我呢個資優哥哥俾左好多壓力佢，所以我係學業上都盡力幫佢。而佢亦都好得人鍾意，好識哄人開心，相信將來會有好多男人死係佢手上。

仲有就係妹釘，雖然佢同我同年，不過就岩岩先升讀中二。呢個女仔愈大就……….愈得佢呀媽既真傳，有時約埋佢去一世媽媽屋企，真係會唔覺意望到呆左，甚至忘記埋自己要玩弄佢既計劃。佢對我亦都….唔知點講，總之…….我……..um……..係囉，就係咁。

Homan

上回講到我以十三歲之齡入讀大學，其實我全家都好開心，不過佢地斷估唔到佢個醒目仔只係因為一個毒撚既重生而有呢個所謂資優既能力。
有晚猥瑣老豆仲突然入左我房同我講解性教育，應該係怕我十三歲早熟，怕我去溝姐姐咁話。當晚佢既講解只可以用悶黎形容，因為佢真係好學術性咁將男女既生殖器官介紹左一次，然後又好隱秘咁用晒代號去同我介紹呢個神聖既生殖過程。咩爸爸好愛媽媽所以同媽媽錫咀然後親親，就有左我喇咁，真係悶到我想開套ＡＶ叫佢睇住黎反省下。

講真我就從來冇打算要越級挑戰，原因係呢班姐姐我根本睇唔上眼，因為我有更重要既任務要做－溝妹釘。
妹釘係呢八年既轉變真係幾大，佢由一個童稚既面孔變到依家亭亭玉立，佢唔似一般青少年咁一上到中學就扮潮童，每次望到佢都會覺得佢係與眾不同，而我就每次都會情不自禁望到呆左。
要接近妹釘，最好既方法當然係以補習為名，親近為實！呢招雖然老土，不過真係好好用，因為我每個星期都可以見到佢，而因為我係學業上幫到佢，妹釘好似不經不覺對我培養左一份敬仰。
而我當然唔會放過呢個機會
「喂阮子榣！你呢次考試成績幾好喎！」
「係呀！今次整體成績真係好左好多！老師都有讚我！」妹釘笑得好燦爛
望住佢呢個笑容，我都不由自主由心度笑左出黎，見到佢誠懇既大眼當中流露出黎既喜悅，我竟然俾佢吸引左，內心仲竟然………有ｄ甜？！清醒ｄ先！依家應該係趁機約佢去街，而唔係變傻仔呆望佢呀！醒呀！
「um……算係咁啦，你成績好左應該要多謝我喎」溝女面皮真係要夠厚
「嘩！乜你咁自大架，雖然你又真係有功勞既！」我有冇眼花？妹釘好似有ｄ面紅………….
「咁你打算點報答我？」嗯…….愈老土既情節應該效果會愈好既……………..
「我請你食野啦！我都知你要返學又要幫我補習係好辛苦架喇，我都唔係咁好意思」妹釘真係面紅！我覺得……好可愛！
「拿一係咁啦，見你呢次考試都唔錯，下個星期六唔好補習住，我請你睇戲！當係獎勵你考得好，又俾次機會你請我食野，你覺得點？」
「嗯！」妹釘輕輕點頭

約會落實之後，我唔肯定妹釘塊面係唔係變得更紅，我只係知道自己竟然好期待下星期六既見面。

呢個星期感覺過得好慢，唔知點解星期六好似離我好遠，我好想佢快ｄ到！究竟呢個係咩心情？依家每晚都係度諗當日約會既行程，又會搵下邊套戲岩妹釘睇，諗下嗰晚同佢食ｄ乜，為左呢個約會，我竟然有ｄ廢寢忘餐。

懷住呢個唔知想點既心情，真係好想搵個人傾訴，我第一時間諗起偉力，佢依家同我讀同一間大學，不過唔同科，雖然依家係少見左，不過我地夾過時間表，每個星期都會搵一日同大家見面食下飯。點知嗰日返到學校，偉力呢個死仔竟然仲樣衰過我
「喂！你做咩笑到咁呀？」離遠望到佢已經陰陰笑，個樣衰到令人有打佢既衝動
「係咩？我冇野！冇事冇事冇事」講完繼續低頭淫笑，呢個死仔一定有“景轟”
「個樣衰到咁仲話冇？你好講喇喎！」佢個樣真係可以用姣黎形容！
「噓！！唔好咁大聲啦！你過黎我同你講」
好我就睇下你個衰仔做咩！
「呢～我上次未同你講過有個女仔叫EVA既～我約左佢星期六出街！」講完又自high！
「哦！？你約人出街呀？」我………都好似係喎…….
「係呀！我想約佢好耐架喇，都唔知點開口！點知上次做project我幫左佢，佢話報答我請我食飯，咁我就順便約佢睇戲，依家心情有ｄ唔知點咁，你話我應該點做呢？」…………………….我想問你你又問返我，不過算啦，幫左你先，反正我都諗得七七八八
同偉力傾傾下，發現佢既問題其實都係我既問題，不過講落我個樣就冇佢咁衰，可能我掩飾得好。
「呀浩！唔該晒你！我依家計劃好晒個心都定ｄ，希望到時表現得好ｄ啦！」偉力拍一拍我膊頭
「咁其實你點解咁忐忑呢？」我好想呢個共通答案
「嘖嘖嘖嘖嘖！呢樣野你唔明唔出奇，你先得嗰十三歲，毛都未出齊，係好難明白大人既世界～拿！就等哥哥話你知，呢ｄ叫做愛情………」偉力擺出一副專家既模樣去同我講解愛情，都唔諗下自己頭先個樣有幾姣！
就係佢滔滔不絕既同時，我既思緒已經唔知飄左去邊…….

食飯　睇戲　出街　妹釘　愛情？？？？！

諗到呢度自己驚一驚醒，而偉力就繼續發姣
「噢！EVA～I Love You～」偉力用一個閃爍既眼神望向遠方，個樣真係令我想「拿」佢
「你個死仔春心動！」我真係冇佢咁好氣

春心動？！um…….都係唔好諗住喇…………

Homan

呢幾日心情實在好似坐過山車一樣大起大跌，一諗起星期六同妹釘既約會，真係忍唔住會典床，但隨即諗起偉力所講既姣話，心裡頭又係一陣陣既忐忑。
直至星期六當日，我比約會時間足足早左兩個鐘就到達妹釘屋企，但係佢屋企門口準備禁鐘既一刻，隻手竟然不其然微震。撞鬼咩，禁門鐘又唔係禁鐘仔，有冇必要咁爭扎呀？！
唔係喇唔係喇唔係喇，禁就禁死就死啦！
一聲叮噹之後，妹釘開門
「Ｅ？乜你咁早既？入黎坐陣先啦！」
我企係門外，望住嗰個我見左八年，每次都展露同一個笑容既妹釘，今次到腳震。坐係妹釘屋企個廳度，唔知點解好似第一次上佢屋企咁，緊張到雙手放係膝頭上面，完全係一個好學生坐姿。直到妹釘準備好出街，我先放鬆返少少
「世伯伯母，我同子榣出街喇，我會睇住佢架喇！」講完妹釘呀爸呀媽呆左咁望住我，梗係啦平時叫開uncle auntie，今日改口你話有冇唔妥丫？

話就話出街，其實都係去屋企附近，過兩個街口個大商場睇場戲姐，點解要搞到咁隆重呢？望住妹釘，明明佢件衫著左好多次，點解今日佢好似著得好睇左？明明佢次次都紮馬尾，點解今日紮得特別馬尾？明明妹釘叫開我做呀浩，點解今日叫得特別嗲？

係唔係我諗多左？點解我覺得今日妹釘特別含羞答答，對眼又鬼咁水汪汪，連個嘴都好似紅潤過人！
「呀浩？」
「下？？！咩….咩呀？」口窒添！
「我地套戲幾點開始呀？」救命呀！點解你要問問題？？？？
「errr……..兩點八呀，差唔多喇，我地入定場，買定ｄ野食差唔多架喇」我都答得幾得體
「好丫！咁我請你食野丫！」又….又又又又甜笑！！！

點解要笑得咁甜？點解要對住我笑？點解要問我問題？點解要叫我個名？點解今日要著呢件衫？點解今日要紮馬尾？點解點解點解！！！！！

成場戲基本上我都冇留意過劇情講咩，我只係不斷聽住妹釘悅耳既笑聲，同一直留意住佢隻手放左去邊。

呀！！！！何光浩！！！你究竟知唔知自己做緊咩？？？？？？

事情唔可以係咁發展，因為我早係五歲已經立定左心志要玩弄妹釘，何以今日我會被佢美色所迷？！冇可能既！幻覺黎架姐！
不過話時話，同妹釘出街又真係幾開心既，姑勿論我有咩居心都好，見到妹釘開心，我又真係幾滿足。
嗰次出街之後，我間唔中都會約下妹釘出街，不過就經常提醒自己要謹記唔好再俾佢迷惑！
不過唔知係唔係我自從同妹釘第一次出街之後顯得有ｄ唔自然，俾一世媽媽發現左我既異樣。有次約佢同妹釘飲茶，一世媽媽趁妹釘去左廁所竟然靜雞雞問我係唔係鍾意妹釘，我梗係老虎蟹都唔認啦！！一世媽媽奸笑左兩聲就繼續飲茶，而我只能夠係心內面慨嘆一句，上一世佢或者冇咁清楚佢個仔諗咩，今世竟然古古惑惑咁嘲笑呢個情竇初開既重生毒男………….究竟呢個一世媽媽有幾多野我係未領教過架呢？

接住落黎既日子，我同妹釘將補習老師同學生既關係維持左三年，而妹釘係我十六歲生日之前既一個星期約左我出街，有鑑於係妹釘主動約我而約會日子又接近我生日，我有理由相信妹釘係想同我慶祝生日既！

廢話！算啦都係講返嗰日，嗰日妹釘未至於飾心打扮，但的而且確係令人眼前一亮！當日既行程雖然唔係好特別，但係好明顯妹釘有花心思去計劃過，當然去邊對我黎講唔係問題，最重要係同妹釘並肩而行，已經好足夠。

回想起呢幾年同妹釘相處，雖然我唔肯承認自己心裡面既答案，不過我既行為都已經出賣左我大半架喇。妹釘呢個女仔，由細到大都冇變，依然係咁識照顧人，依然係咁善解人意，同佢一齊真係好開心。

不過快樂既時光唔係維持左好耐，當日既約會俾一個電話破壞左，令我同妹釘既心情跌到落谷底。

一世媽媽入院了。

Homan

我最擔心既事情終於發生

約會當日收到電話，知道一世媽媽入左院，我同妹釘即刻趕去醫院，可惜去到探病時間已過，我地唔可以見到一世媽媽。
第二日我等埋妹釘放學一齊去醫院，去到見到妹釘媽媽企係走廊，佢同我地講左一世媽媽既病情。
原來一世媽媽有肝癌，已經發展到末期。醫生推斷一世媽媽係諱疾忌醫，話好多老人家都怕死，知道自己有病都唔去醫，而一世媽媽呢個情況恐怕係佢已經忍左痛一段日子，可以幫到佢既已經唔多。

妹釘聽到之後忍唔住喊左出黎，我亦都唔好受。不過我知道與其係度喊或者悲天憫人都係冇補於事，不如係呢段時間多ｄ陪下一世媽媽，等佢開開心心走埋呢段路。

為左陪伴一世媽媽，我將手頭上既工作全部停止，除左返學同幫妹釘補習之外，一有時間我就會去探一世媽媽，呢段探病既日子持續左半個月。見到一世媽媽卧係病床上面，其實都好唔忍心，我一方面唔想佢離開我，另一方面又唔想佢咁辛苦，內心既交戰令我痛苦。

有一日，我如常去醫院探望一世媽媽，當日佢比平時精神，仲同我開玩笑添
「哎唷浩仔～返新工呀？」
「返新工？」
「扮熊貓呀！呵呵呵呵呵呵…….」一世媽媽笑得開懷
呢個笑話雖然爛，但我聽得好開心，難得一世媽媽咁高興
「搞爛gag喎你！今日有冇好返ｄ呀？」我移好椅子除除坐下
「好！梗係好啦！今日都唔知幾好，醫生都話我精神呀！」一世媽媽表情得戚，成個小朋友咁
「咁未好囉，今日食左ｄ咩呀？」難怪人地話老人家同小朋友一樣，都係要哄
「未又係嗰ｄ！食到個人口淡淡呀！」媽媽又擺出一個厭惡既表情，估唔到佢都有咁鬼馬既時候
「哈哈～咁快ｄ出院我請你食好野！」
「係就好囉！我食窮你架！不過都唔知有冇機會出院囉…..唉……」
一世媽媽突然講出呢句說話令我一下子呆左
「呀浩仔呀你唔洗成日黎探我囉……你都要返學，俾多ｄ心機溫書，讀多ｄ書個人先有用架….唔好好似婆婆咁，一世人淨係識得死做爛左又搵唔到錢……..拿…..聽婆婆講…..俾心機讀書呀知唔知呀……」一世媽媽突然語重心長令我唔知點招架
「嗯…..我會架喇…..你唔洗擔心…..」我好怕佢聽到我想喊
「你唔洗傷心喎浩仔，人總有一死架喎，當年我個仔同我死鬼老公死既時候我都同你一樣好傷心架，未又係咁捱過左，更何況我都八十幾歲囉，死左都係笑喪！」一世媽媽既樂觀令我更悲傷
「都岩架喇，我死鬼老公同個仔都走左咁多年，都係時候要陪佢地囉……..」媽….我係度呀……
「拿，浩仔，婆婆識左你咁耐知道你好乖既，第時要好好地對屋企人同妹釘知唔知呀？唔洗好叻唔洗搵好多錢架！最緊要你做個好人，唔好做壞事，咁婆婆就高興架喇！」媽媽用佢最溫柔既語氣同我講呢番說話，我…..唔識點反應………..

嗰日一世媽媽同我講左好多野，唔知係唔係佢趁有機會盡情抒發。雖然佢有提及過關於我既前世同老豆，不過我冇追問，因為從一世媽媽嗰日同我講既說話，我知道佢其實心裡面一直有遺憾，就係唔可以同自己既老伴白頭到老，同埋唔可以睇住自己個仔成家立室。
嗰日我陪佢陪到探病時間完結，而佢亦都講足咁多個鐘，講到最後佢笑自己長氣，係咁趕我返屋企。

而嗰晚我鎖左自己係房度，將自己收係被竇裡面，泣不成聲。

Homan

嗰次一世媽媽咁精神咁我開玩笑，我差d以為佢回光反照。不過唔知係唔係個人樂觀對個病會好d，原本俾醫生批話得返兩個月命既一世媽媽竟然生存多三個月，我仲妄想過佢會冇事返出醫院添，哈.......

呢段日子我同妹釘等等都經常陪住佢，佢每日都話自己依家賺緊，要享受人生，留係醫院屈就左佢喎，我地都明既，醫院既生活真係苦悶，但我地怕佢咁虛弱，出到醫院會捱唔住。

雖然話一世媽媽好樂觀，而佢既留低亦令我地好高興，不過我始終覺得呢段日子唔實在，一世媽媽好似好虛無，一觸碰就會變飛灰，所以我唔敢做 d咩去刺激佢。

嗰晚我如常去探病，坐到探病時間結束，臨走既時候心裡面竟然有一絲微盪
「婆婆呀 ....」我唔知可以講咩....
「咩事呀浩仔？唔想走呀？呵呵呵呵....」媽媽又開玩笑，但我笑唔出
「哈....」
「快d返屋企喇！聽日先再黎，婆婆都走唔甩囉！」
我苦笑，然後同一世媽媽講再見。
我走時回頭望過佢幾眼，發現佢今日好似比平時落寞，而佢嗰句「再見喇浩仔」 係我心裡面回盪左好耐。

第二朝我收到妹釘電話，一聽妹釘把聲就知道佢喊過，佢係電話既另一邊欲言又止，其實我都已經估到係咩事………妹釘話婆婆琴晚凌晨過左身，係睡夢之中離開，冇痛苦，好安祥。我感覺到自己既心停左一下，隨即再跳動，嗰一秒過左好耐，好多念頭閃過。原來琴晚個天真係叫我望多佢幾眼，因為今日我地已經天人永隔，冇機會再見面。

婆婆既後事交由妹釘一家處理，我覺得可笑既係身為佢既「獨子」，但係擔蕃買水既竟然唔係我。我唯一可以做既，就休返舊居度，幫手執拾一下一世媽媽既遺物。

返到舊居，傢私、擺設就連家中既氣味都冇變過，可惜故人已經不在。
我入去媽媽既房間，搵到唔少相簿，裡面有好多我細個時既相片，仲俾我搵到一本我父母既結婚相簿。我坐係床邊，逐頁逐頁翻開相簿，我就好似睇到佢地由結婚到大肚到我出世到我幼稚園畢業嗰ｄ開心既情景，我發現佢地既笑容真係好由衷，因為人生最快樂，莫過於就係同自己最愛既人長雙斯守，見住自己既愛情結晶品快樂咁成長。

望住一張又一張發黃既照片，我個心既苦又甜。可惜照片紀錄到我中一、二就已經停止，應該係因為我反叛期唔想再同父母合照，覺得實在太老土，到依家想做，都已經冇機會。

愛一個字　也需要及時………

Homan

係執拾一世媽媽既房間之後，我準備進入自己既房間
雖然我識左婆婆已經十一年，但呢段期間我都冇入過去前世自己既房，妹釘冇入，媽媽亦都冇開過門，而我亦都唔敢去掂。
再次推開原來屬於我既房門，一陣霉臭氣味傳出。只見房內的擺設完全冇變，只係我以前凌亂既睡房變得整齊，同埋睡床上多左數個大紙皮箱。
我好多謝一世媽媽同爸爸幫我執好間房，亦都保留晒我所以遺物，間房甚至俾我在世時更整潔，就好似…………等緊我返黎再住一樣。可惜，呢十幾年黎我一直冇勇氣去觸碰以前既一切，直到依家我先知道呢兩個老人家究竟係有幾掛住我。

我打開紙皮箱，第一個箱放住既係我以前既衣物。每一件衫褲都熨得筆直，而且摺疊得好整齊，我逐件逐件拎出黎再仔細咁睇，發現就連衣物上既每個小破洞都縫補好。我唔敢將眼淚滴到衣物上，因為我怕會弄髒媽媽既心機。我連忙拭去面上既淚水，再將衣物放回箱內，然後封好，再拆開第二個紙皮箱。

第二個紙皮箱擺放既係我兒時既玩具，大部分都係巴士模型。玩具擺放有序，全部由大至小由下至上整齊排列，而有一件玩具係以報紙包裹，用膠紙封實。
我拎起呢件特別處理既包裹，小心打開，當我見到包裹中物件時，我個心真係好似俾人捏住一樣，好痛……………..
包裹內係一架巴士，司機位上有一幅小畫，上面畫住一個小司機，小司機高舉雙手，笑得開懷。巴士既左側有兩位乘客，一男一女，面帶笑容而且手牽著手，好不甜蜜。
冇錯，小司機就係我，乘客係我既父母。記得當年我好鍾意呢架巴士，每次經過都要望幾眼先肯走，係我六歲生日既時候，一世爸爸買左俾我，我興奮到即刻拆左出黎，然後係飯檯上面不斷「駕駛」，仲話第時要同爸爸一樣做個好司機，每日接載佢地兩個周圍去，於是我即刻畫左佢地上去，再畫埋自己做司機，就係咁玩左成晚。

呢架巴士唔知幾時已經唔再係我既最愛，我將佢收左係模型櫃既最深處，好耐都冇拎過出黎，甚至忘記左佢既存在。估唔到一世父母係收拾我遺物既時候搵返佢出黎，仲珍而重之將佢包好，我冇諗過我細時既童言會對佢地有咁大既意義，又或者根本係我自己冇放過上心。

我包好巴士，封好紙皮箱後，我行出大廳。媽媽留低既物件唔多，我地只係拎左佢幾件衣服同一ｄ小飾物俾佢上路，而我就係佢留低既相簿之中拎走左三張相，同埋嗰架意義甚大既巴士。

返到屋企之後，我將照片放好，再將巴士放係我書檯既當眼處，然後我執筆寫左一封信，將我重生呢個事實話俾佢地知。我好想將我對佢地既悔意寫晒落去呢封信上等佢地知道，但當我想落筆時，發現任何措辭都不及簡單既幾個字

爸、媽，對不起。

一世媽媽既離開令我知道我以前有幾咁唔好，上天選中我俾我遇上芷瑤去重生，我諗目的除左想令我呢ｄ冇晒生存意志既人再次珍惜生命之外，可能就係想我知道究竟我做過ｄ咩壞事。不孝子從來係社會之中都俾人唾罵，如今我竟然得天獨厚可以重生，生活係一個小康之家，仲可以保留原有既智慧，一路上可以話平步青雲。但個天咁做或者唔係想我玩弄呢ｄ小聰明，而係要我引上一世為鑑，去反思究竟我依家又係唔係一個好兒子，有冇做返個乖仔去對待我既二世父母？

諗深一層可能因為我保留左上一世既意識，加上我一心打算要搵返上一世父母，呢十幾年認真享受過、開心過、難忘既經歷好似真係少之有少。試問一個三十歲既毒男又點會享受去海洋公園玩、去公園跑跑跳跳、甚或至係同爸爸媽媽講肉麻說話？

呢段日子我腦海裡面時不時就有呢ｄ念頭浮現，有好多問題想問自己，偏偏自己解答唔到，搞到個人神不守舍。有時候放學就收埋自己係房裡面，望住書檯上既巴士，回憶起以往同一世父母既時光，個人真係提唔起勁。

靚媽媽同猥瑣老豆見到我咁都覺得驚訝，因為佢地既叻仔從來未試過咁抑鬱，佢地估唔到一世媽媽呢個冇血緣關係既「婆婆」既死會對我有咁大影響。一直開朗既靚媽媽為左我呢排既情緒問題搞到愁眉不展，好彩有猥瑣老豆安慰佢，而佢亦都好關心我，每日工作幾忙都好都會盡力抽時間去同我傾兩句。不過我口硬，淨係同佢地講因為婆婆好鍚我，所以佢離開我唔開心。雖然我敷衍亦都辜負左猥瑣老豆既關心，一直以黎佢對我有幾好我係知既，不過講出黎就肉麻架喇。

Homan

除左我之外，妹釘亦都好唔開心。雖然嗰個唔係佢親生婆婆，但佢對婆婆既感情實在太深，由出世到依家十六年，每個星期總有幾日會見到呢個愛錫佢既婆婆，見面比佢既親婆婆還要多，嗰種感情真係唔簡單。有時同佢補習傾計，見佢提起婆婆既時候，雙眼都會帶有淚光，每次我都會俾佢帶動，有想嚎哭既衝動。

一世媽媽既死令我同妹釘親近左不少，可能因為大家相識相知，有共同既諗法，令到大家對大家既感覺唔同左。

記得嗰一日我幫妹釘補完習去食飯，我地散步去到海旁，坐係度吹住海風，望住黑漆漆既大海傾心事，一傾就係三個鐘。當中有笑有淚有苦有甜，而最令我難忘既，係妹釘係臨離開海旁前錫左我既面頰一啖。呢個親吻令我既腦海變得一遍空白，從前既玩弄、拋棄或是報仇心態通通拋諸腦後，慢慢浮現既，只有保護佢一生一世既念頭。

回家既路上，我拖住佢既手，然後望一望個天，心想

「媽媽，你將會有一個好媳婦」

係十六歲，亦即係我在世四十六年期間，我經歷左高低起跌，上一世嗰三十年既虛耗，再加上重生既呢十六年，係對比之下，我知道咩叫為時已晚，我知道咩叫珍惜眼前人。呢兩世既經歷令我醒覺，我知道如果我再唔珍惜我依家既人生，我將會後悔多一次。

於是係十六歲既呢一年我正式同妹釘一齊，我冇對屋企人隱瞞，反而雙方既屋企人知道左都冇反對，仲好開心。

時間過得好快，我終於畢業出黎搵野做，雖然我表面上廿歲未夠，不過經歷令我成熟，或者唔係咁多僱主會信任一個後生仔，不過都叫搵到份好工。

做左幾年野之後，就到妹釘畢業，雖然佢讀書唔叻，不過佢志願做個老師，話要作育英才，教好ｄ小朋友。我地都覺得呢個職業好適合佢，因為由細到大佢都好識照顧人，相信將來一定會係一個好老師，亦都會係一個好媽媽。

我地兩個雖然收入唔多，不過係一世媽媽既袐佑之下，我同妹釘都生活得好開心，係二十六歲既時候，我地實踐左對對方既承諾，我同妹釘正式拉埋天窗。我仲記得婚禮前幾晚，我夢見一世媽媽，佢面上掛住一個欣慰既笑容，同我點左一下頭。我感覺到，佢好開心，我亦都感覺到佢真切既眼神裡面，包含住既係望住自己個仔成家立室既滿足。至於我同妹釘既婚禮簡單而隆重，雖然我想俾一個華麗既婚禮妹釘，不過妹釘話難忘就夠，最緊要係大家開心。你話，得此賢妻，夫復何求？家室已成，呢幾年我地都好努力咁工作、儲錢，為既都係俾一個舒適既家庭另一半。

呢件大事既撮成，當然唔少得我地之間既月老－一世媽媽。都係因為一世媽媽，我先識到妹釘，有時我甚至會諗妹釘同我一齊會唔會係佢搞既鬼。妹釘每年定時定候就會打點一切去探一世媽媽，我地亦都有個共識，就係無論幾忙都好，探望一世媽媽呢個指定動作一定唔可以忘記。每次妹釘去到，都會同一世媽媽傾計，講下呢幾個月做左ｄ咩，有時仲會告狀話我蝦佢，要一世媽媽報夢教訓下我咁話喎。而我就會默默係心裡面同媽媽講聲我過得好好，叫佢唔洗擔心。

依家既我，係一個幸福的人。