三餐牛肉 (下) 之 沙田 Mr Steak -- 從頭到尾都好食之選

egg_studio

今日早午晚三餐都係食牛，而其中午晚兩餐都要介紹吓，所以分上下兩 post，以免讀者搞錯兩間食肆。

之於早餐都係普通茶餐廳嘅沙爹牛肉麵 + 餐飲凍奶茶，冇乜特別，可以不提。

下集講晚餐

晚餐仍然響沙田；如果平時多響沙田出沒，應該知道沙田最大商場內食嘢唔平，平日一餐午餐唔過一舊就算平。平時新下午茶時段幫趁過 Mr Steak ，下午茶約 $60-$80，不過食物質素高，就算下午茶都做得好有心。

今日試吓晚餐，發現晚餐比下午茶抵！我 order 了網燒澳洲和牛，價錢二百多 d，已經有湯 + main course + 甜品 + 咖啡或茶。

我不愛和牛，因為我屬美國牛肉派。不過見和牛前面有 "澳洲" ，咁即係唔係和牛，所以立刻 order。

餐湯有約四款 (唔要餐湯可選沙律)，我選咗黑松露大蒜湯。二百零蚊一 set dinner 當然唔相信有黑松露，黑松露汁都冇、黑芝麻扮黑松露亦冇，不過我最懷念嘅係大蒜湯 -- 當年去某國家旅行，日日飲大蒜湯。大蒜湯很濃，回味無窮。



澳洲和牛上枱，一刀切落去，好！唔係日本和牛。入口雖不及美國牛果種重牛肉味，不過油份及牛味適中。牛肉表面燒得香脆，裏面鮮紅、肉質有咬口。

之後 order 凍奶甜品及咖啡。凍奶做得唔錯，而咖啡用豆磨，並非咖啡粉沖，配全脂奶一小瓶。雖則唔係乜嘢高成本，不過坊間一 d 中價西餐廳都不論咖啡或茶，一律花奶了事。

Mr Steak 有幾間分店，不過冇連鎖店果 d 工業化烹飪流程，反而廚師烹得有心機，值得一去再去。

上集請睇 http://www.photomarket.hk/forum. ... tid=3959&highlight=

Homan

Mr. Steak 我吃過CWB的幾次，都覺得不錯，可以一試～