翻新中古單車 project 2 -- Lemond 平把 road bike

egg_studio

繼上年翻新中古鋼架單車後，幾個月前二手購入一個 Lemond Tete De Course 車架，約八成新，連原裝七成新碳叉。

車架：Lemond 係 under Trek 嘅一個品牌。車架 2006 年出廠，特色係以鈦及碳人手焊接，因此產量少、價錢貴，結果出咗一年半載就停產。而據外國用家分享，呢幾年碳架成本平（大陸碳架仲平！），又可以大量機器生產，因此 Lemond 都轉走純 carbon 路線。而鈦方面，始終貴，所以將來點都會被鋁代替。

因車架返嚟時已經八成新，加上鈦 + 碳關係，所以只需做以下步驟就變咗九成新：

• 深度清潔：用藍威寶大清洗油跡。
• 打磨：用汽車粗蠟、然後幼蠟打磨，最後打一層光蠟。
• 碳叉方面，就冇得搞，所以洗完都係得七成新。
  

當有埋呢個車架後，就實現有齊碳、鋁、鈧、鋼、鈦 -- 五種主流車架物料車隊！

組裝：因為車架為 59 cm -- 我本身踩開 54 cm，56 對我嚟講係巨大，但由於車架唔係水平架，彌補咗 size 大嘅問題。亦因為 56 cm 關係，我會以巡航 setting 為主，所以會用平把。

原裝跟碳鵝頸，不過成 130mm 咁長，我暫時用支 100mm 代替。

Seat 通及 seat 位：原裝為 Bontrager Race X lite，上手冇包，不過響大埔某單車鋪搵到倉底貨，開心價買咗。Seat 位就用番早前諗住買嚟收藏嘅 S.Manie Air Racing (235gram)，貪佢有 cushion ，而顏色都夾到。



前餅：用番中古經典 Shimano Sante 鵝蛋餅 -- 呢一年半載有廠商突然翻閹鵝蛋餅，又吹捧到神級，令 d 新手如痴如醉。想當年，又係唔知邊個話鵝蛋餅唔好，「推薦」d 車手轉晒圓形餅，當市場上全部係圓形餅後，鵝蛋餅又突然間變成無敵？既然無敵，咁賣番天價都十分合理。

不過，想平平地試踩鵝蛋餅的話，可到「著名」二手網站搵搵，Sante 或 600 系列都係 US$50-$100 左右。Sante 重量為 478g（右脾）+ 217g（左脾），但死位就係 Shimano 四方芯（行珠盤） -- 333g 重。所以買入 160g 的台灣鈦芯（行啤令）。咁整 set 前餅都係 855 gram，以 20 年前的前餅，重量十分合理。



呢塊 Sante 我都用咗十幾年，直至三年前轉 CAAD9 時先退役。因本身已有花痕，先用藍威寶深度清潔，再用「金寶去污液」一次過洗去油跡及磨走花痕。「金寶去污液」其實係打磨軟膏，冇沙粉咗硬，打磨完後可保持番 Sante 嘅白色，但冇損害表面。之後上番汽車蠟就變番九成新。

轉波：波就唔玩中古了，因為轆的考慮（見下文），暫時用住現成 road bike 的轆，所以配咗 SRAM 嘅 10 速 DoubleTap 平把波手。市場上有 Shimano 及 SRAM 有出 10 速平把 road bike 波手，但基於個人喜好，選了 SRAM。

Red、Force Rival 及 Apex 四個系列，從價錢、重量及性能方面考慮，波腳用 Rival，brake 用 Apex，手掣用 SRAM（早前響某單車黑店，店員當我新手，推薦我用 V-brake 手制配 C-夾，請大家留意，千萬不可，記得 V-brake 不能配 C-夾！）波撥用番中古 Sante -- 按上面「深度清潔」步驟復原。

當年官方相

車轆：暫時用住現有 road bike 車轆，但稍後會進行另一翻新工程，對象就係當年嘅 Wolber  Titane Magnesium 原子鈴 -- 呢對轆響十幾年前大約踩咗四、五年，因為原子呔太麻煩，而當年又係 d 廠商吹捧原子呔有幾唔好，搞到有一輪市場上冇晒原子呔及鈴，迫住要轉內呔鈴。咁又係同鵝蛋餅一樣，「突然間」原子呔又變番無敵，而近期發現，我對 Wolber 鈴響二手市場炒到 US$150-US$200 一條淨 rim （不是一對；不連 hub 及線），仲貴過當年買。

因此，下一步就係翻新中古車鈴，請大家留意~~~

Homan

如果翻新中古 CAAD4 eggstudio 兄又有乜建議？

egg_studio

Homan 發表於 25-3-2012 02:08 PM
如果翻新中古 CAAD4 eggstudio 兄又有乜建議？

要睇咗你部車乜嘢情況先有得傾......同埋你嘅用途 -- 巡航、踩長途（例如返大陸/外地）、比賽？每種用途 setting 及配件都唔同。