【古物復修】九廣鐵路三等車廂木櫈

egg_studio

70 年代尾 80 年代頭，九廣鐵路電氣化，從柴油火車轉做電氣化列車（正確應該叫「動車組」~~），當時除了重建及加建車站外，有一個車站拆卸，就係和合石站。


細個時耐唔終會踩單車去和合石站，睇住車站及一帶農田被夷平，然後發展做新市鎮。早前版友介紹，車站遺址附近一戶人保留了一張木櫈，是九廣鐵路三等車廂木櫈，大約有接近 70-100 年歷史（因為未深入對比屬邊個年份車卡，但估計是第一或第二代柴油車卡）



近日認識村民，了解木櫈由來及和合石站軼事，當中故事頗有趣，稍後分享~~ 最後，有幸獲贈此櫈！！於是準備「古物復修」！叫「古物」，不是「文物」，因為個人認為車廂木櫈歷史價值不及整卡車廂，而且鐵路博物館裏的車卡有齊數的木櫈，不過若屋企自用，觀賞價值卻非常高！




先出幾張相及復原圖，稍後一路修一路 update~~ 大家有興趣請留位。




木板狀況不佳，少咗一條，未決定全部重造定保留部份。






鉸位脫落，上番螺絲就 OK。櫈腳比原裝（博物館入面果張）短，但切口整齊，估計當年是直接從客卡上鋸落嚟。







因長期插在泥土裏，櫈腳生銹消失，稍後要「駁腳」。




原裝三等車廂地面鋪紙皮石，所以計劃做塊木板做底座，上面鋪紙皮石，一來能夠固定，二來方便搬來搬去。

egg_studio

復修完成~~



木櫈的來龍去脈請睇我網站《真 . 硬座！復修九廣鐵路三等座位》，響呢度簡單地介紹一下復修過程：




1) 將木櫈解體，鐵框狀況良好，木就非常差，只有背板可重用，但配新木後可能唔夾，所以索性換曬所有木；原裝木留番做其他用途；


2) 鐵框大清洗及打磨，然後送去相熟工場燒焊及「駁腳」；





3) 工場話做彎腳比較麻煩，但因為相熟，都搞得掂；（火車博物館裏嘅舊車廂 302、223 及 229 就駁直腳，相對較失真（可睇番樓上嘅相））；


4) 響香港嘅木行搵木，原本想搵番柚木，但好多木行都冇咁長嘅柚木實木條（蔗渣木木條就有咁長），否則就可以揀做卡板果啲木，但我認為唔靚……


5) 另外問過前九鐵工程師關於三等車廂資料，佢依家響澳洲開工，順手幫我問問澳洲木，有就有，但好貴~~~ 於是轉向內地；


6) 搵幾間木行，因為冇得返大陸，所以只靠微信 QQ 等睇辦及溝通，又問過一位香港做裝修嘅朋友，最後推荐用舊榆木（老榆木），一來會升值，二來啱我要求，三來價錢係香港買蔗渣木嘅價錢；





6.5) 題外話，因為舊榆木（老榆木）唔係隨時有，木行搞咗成兩星期先搵到料，寄到香港後發現其中一條 size 及木紋唔啱，佢地免費重做，所以依家多咗一條，大家有需要可聯絡我；





7) 反而上色就諗咗一排，究竟跟博物館定自己創作？後來榆木做好，就以榆木木色及紋理去諗，最後決定跟三等火車車皮「鐵皮綠」；


8) 100 年前用窩釘做靠背關節，但依家冇人做窩釘，就算相熟工場都搞唔掂，唯有用絲母及塾片代替。

egg_studio

leonkin 發表於 13-7-2020 03:25 PM
正喎! 看來修復得不錯，隻腳打算就咁落地? 定會加塊板?

燒焊時做多咗一對支架，駁響櫈腳上，目的係防止坐上去時「發」後，但試過唔加支架都冇問題，所以冇用

egg_studio

小更新：木已做好，鐵架亦搞掂，稍後二合為一，但預計背板要修一修先入到卡位。

egg_studio

leonkin 發表於 28-5-2020 10:58 PM
係喎....咁和合石站係咪無哂遺跡?

搭車經過，橙色大閘仍在，是和合石線唯一「遺蹟」

egg_studio

燒焊接番兩隻腳~~


因為不會鑲落地板，所以另外做多一條水平的長腳，防止坐得後時訓低（相中冇安裝，稍後補番）


呢個工序嘅難度位係弧形嘅腳，幫我做翻新嘅工場有機器做番弧腳，反觀博物館就用直腳就算，呢一部分應該做得比博物館好。


下一步等木廠交貨，然後根據木色決定金屬框上乜色；初部不會跟博物館的淺啡，一來淺啡未確定是原色，二來放屋企唔靚。

egg_studio

今天拆解及清洗木櫈，準備翻新。


先將木板與鐵框分開，然後打算將椅背拆開，發現椅背的鉸位不是用螺絲絲母，是一種類似窩釘，稍後要請教專業人士究竟係乜，而鐵路博物館火車的櫈明顯是翻新過，用螺絲絲母代替了。


木板情況唔理想，應該要全部換過新。鐵框情況良好，只是表面少少銹，清洗後見到紅丹及原裝漆油，木板亦留有少許原裝漆油，確認木櫈原來顏色是接近「肉色」，與博物館的淺啡不同。現在未決定用「肉色」、淺啡或自行配搭，希望搵到彩色照片作為參考（但未搵到，全部係黑白）。












原裝漆油。



原裝漆油及紅丹。



鉸位。






「窩釘（其實唔知叫乜）」一粒過，冇得拆出嚟，亦唔知當年點樣打入去？

leonkin

咁快手呀 我本來都想去睇下，都係最近有人講起...哈哈...有你保存更放心

和合石站的椅好似就係呢D火車凳，九鐵一向都係「用得唔好唗」，早前月台的凳用前一代黃頭凳

egg_studio

點會「快手」哇？擺咗成40年都冇人要，40年後先輪到我。

我整好後你嚟我屋企睇啦

根據村民憶述，木櫈的來源是，當年有舊火車卡響和合石站拆解，然後當廢料賣，村民的老豆買咗佢，但價錢唔知，一直放響屋企「範圍」（即是你之前見果個位置）

egg_studio

問題係未知當年和合石站拆解果架係乜型號（年代）的車卡……

AnsonNgNg@FB

leonkin 發表於 28-5-2020 05:20 PM
咁快手呀 我本來都想去睇下，都係最近有人講起...哈哈...有你保存更放心

和合石站的椅好似就係呢D火車 ...

黃頭月台凳，新界某幾條村仲有

leonkin

egg_studio 發表於 28-5-2020 05:34 PM
點會「快手」哇？擺咗成40年都冇人要，40年後先輪到我。

我整好後你嚟我屋企睇啦

係喎....咁和合石站係咪無哂遺跡?

leonkin

AnsonNgNg@FB 發表於 28-5-2020 09:27 PM
黃頭月台凳，新界某幾條村仲有

嘩...呢個堅....點由月台夾走呀?

egg_studio

由於鐵路博物館未開，所以先從以前影落嘅相睇睇……


我張櫈響 229 號（1955 年製）及 302 號車卡（1920 年製）出現，最有趣是，229 號車廂內的櫈有幾張嘅櫈腳都係有切割然後燒焊嘅痕跡，但 302 號就唔知（因為冇特別影櫈腳）。切口位置同我張櫈一樣！所以我有兩個估計：


1) 當年的新車廂（229）的櫈是從舊車廂（20 年代製的第一代）拆過嚟重用；
2) 復修車廂時嘅木櫈都係從「拆車件/ 廢料」搵出嚟，所以同我果張一樣，櫈腳是被切割的。


至於 302 號及其他車廂有冇發現？要等博物館重開，稍後有報告。




229 號












（呢張係網上照片，所以唔肯定係咪 229 號（雖然睇個窗口就似））



（呢張都係網上照片，係 302 號）

egg_studio

leonkin 發表於 28-5-2020 10:58 PM
係喎....咁和合石站係咪無哂遺跡?

冇曬。當年路軌位置變曬大廈，車站變成馬路。唯一的遺蹟係支線入口嘅橙色鐵閘，但我唔肯定呢一刻仲有冇，要請鐵路迷回答。

egg_studio

今日到過鐵路博物館，特別留意邊款車卡用邊款櫈。幾節三等車卡木櫈配置如下：




「彎腳」：
302 號（1911 年）
223 號（1955 年）
229 號（1955 年）




「直腳」：
002 號（1921 年）
313 號（1910 年）<-- 最新搬入去果架





據資料，最初百幾年前車卡是金屬底盤、木製車身，後來經過幾十年改裝、淘汰、做新車，當中有部分物資會重用（本版會員指出：木櫈外，仲有轉向架上零件），所以單憑上面資料，不能完全解釋木櫈歷史。


又咁啱得咁竅，今日見到相關人員及前工程部人員，分別問了木櫈問題，及和合石站使用及清拆時的詳情，稍後整理分享。


而 302、223 及 229 號有部分木櫈櫈腳有切割燒焊接駁痕跡，令我深信當時九鐵是將木櫈從舊車卡搬去新卡用。


今日亦量度了木櫈尺寸，但未能得知原本木櫈顏色（博物館入面全部油淺啡，不過從某啲黑白照片及影片睇到，木與金屬架應該唔同色）


下星期將進行復修，大家有興趣請留位~~~

AnsonNgNg@FB

leonkin 發表於 28-5-2020 10:59 PM
嘩...呢個堅....點由月台夾走呀?

記憶中大埔墟換月台凳時，呢堆凳放曬在村巴站對面新達下空地，其他站處理方法就不清楚了

shiulung

好正

egg_studio

leonkin 發表於 28-5-2020 10:58 PM
係喎....咁和合石站係咪無哂遺跡?

和合石支線的入口（紅色閘），就是現存的遺蹟。

leonkin

egg_studio 發表於 15-6-2020 05:42 PM
和合石支線的入口（紅色閘），就是現存的遺蹟。

謝謝你, 就由這裡分支吧~

期待你火車博物館的收風報告

egg_studio

leonkin 發表於 15-6-2020 05:52 PM
謝謝你, 就由這裡分支吧~

期待你火車博物館的收風報告

火車博物館冇風收。

根據博物館回覆，博物館歸康文署管，但博物館及康文署都唔容易攞到九鐵舊資料，反而我地仲有渠道攞到，所以博物館冇風可收。

leonkin

egg_studio 發表於 16-6-2020 01:48 AM
火車博物館冇風收。

根據博物館回覆，博物館歸康文署管，但博物館及康文署都唔容易攞到九鐵舊資料，反而 ...

正喎! 看來修復得不錯，隻腳打算就咁落地? 定會加塊板?