小米家庭（小米智能家居）開箱文

egg_studio

近日從深圳小米買入小米智能家居，先安裝一個簡單系統，為咗實現以下目的：

• 經手機開關客廳多盞燈，目的係返屋企前着定燈，及出街唔記得熄燈都可以熄番。
• 經手機開關戶外燈，夜晚揸車返屋企時可預先着戶外照明。
• 於日落時自動着燈，仲要每日着唔同嘅燈（係防盜嘅考慮，唔係住村屋嘅未必明白）
• 於睡房開關客廳燈，咁訓覺時，先入房，然後熄客廳燈。
• 於睡房開關戶外燈，當有野豬、怪獸、神秘人等等在屋外出沒時可儘快開燈及響 alarm。
  

所以，買了以下設備：

• 小米多功能網關 -- 即係主機（控制中心），但佢亦係喇叭及夜燈，下文有介紹。
• ZigBee 小米 aqara 智能牆壁開關插座（單火版）（點分單火、零火？請看下文）
• ZigBee 小米 aqara 智能牆壁開關插座（遙控版）
  

舊式智能家居及單火、零火

如果你明白單火、零火係乜，可 skip 此段。

我唔係電工，所以只用最簡單說明。如果睇完唔明，或想尋根究底，請查書、請教電工或留言，大笪地有電工牌會員，我都係搵佢幫手搞。

早幾年，香港某網絡商推出咗智能家居，近年香港、國內外亦有公司推出類似系統，但總未成為氣候。其中原因，除咗價錢外，安裝係一大問題。

大部分香港單位，電燈掣入面只有一條火線：

• 未㩒電燈掣時，電路開放，即係冇電，電燈唔着；
• 㩒咗電燈掣時，電路閉合，即係通電，電燈着咗。
  

而智能家居嘅電燈掣係經無線電與主機通訊（小米用 ZigBee 通訊協定，比 WiFi 或藍芽安全及低電耗），咁問題就係：未㩒電燈掣時，冇電，咁電燈掣又點樣接收訊號呢？舊式智能家居需要響電燈掣入面拉多一組電源線，供電俾電燈掣本身。因此，一般家庭只會響新屋大裝修或舊屋大裝修時，順手響各個電燈掣拉條電源線，好少家庭會為咗安裝智能家居無啦啦鑿穿牆去拉線。

而小米及近年嘅智能家居系統，解決咗電燈掣攞電問題，即係可以響只有火線、電路開放情況下，電燈掣都攞到電。原理其實唔複雜，上網查下都會搵到 -- 由於我唔係電工，不作深入解釋了。

總之，香港家庭就一定要買單火版，不要買零火版！




安裝

安裝家居系統涉及電氣，必須由註冊電工安裝。我有電工牌會員幫手，我只負責打字及影相。


拆出客廳燈 A 燈原本電燈掣，可見只有火線（紅色）。


另一個電燈掣比較複雜，原本係四掣，分別控制三盞戶外燈，及客廳燈 B，我想改為兩個掣，左掣一㩒三盞戶外燈同時着，右掣開關客廳燈 B。


因為四個掣來自同一個 fuse（20A），足夠三盞戶外燈（各 80W）及客廳燈 B（20W），所以電工駁幾駁，搞掂。（圖中可見，小米牆壁開關插座背面好大舊，有機會唔夠位塞入牆內……）


客廳燈 A、B 及戶外燈嘅電燈掣安裝完成！（上圖是單鍵掣，下圖是雙鍵掣）






電工收工，接住自己搞 --

• 手機安裝 Mi Home（米家）；
• 插上小米多功能網關（簡稱網關），米家 apps 搵到網關，輸入 Wifi 密碼，網關接上屋企網絡；
• 米家 apps多咗「多功能閘道」（即係網關）；
• 響多功能閘道 / 網關加入上面電工安裝嘅電燈掣，及貼響睡房嘅小米 aqara 遙控版開關插座。
  

根據說明書，網關與 router 應保持 2 至 6 米距離。


Pair 牆壁開關插座好簡單。




網關亦可作走廊燈，在米家 apps 操控，可控制光度及顏色，亦可按情況自動開關，例如：

• 有人開門，網關會控制客廳燈 / 自己燈 / 播音樂（需要配合小米門窗感應器或人體感應器）；
• 當門鐘：需要加一個單鍵牆壁開關插座（遙控版）裝響屋外，當有人㩒掣，網關會響 / 播音樂 / 着燈 / send message 去你手機 / 啟動 CCTV 拍低門口係乜水？
  

米家 apps 就係手機上的控制中心。我早前買咗空氣清新機，響大數據年代，空氣清新機連上網絡，除咗可以遙控開關，仲可以因應屋內 PM 指數自動開啟，及上載我屋企空氣指數，同全國小米空氣清新機一齊監察大城市空氣質素。（當然，一定有人又擔心乜乜私隱，不過，當你用 Google Map 時，若唔 share 自己上大數據，就唔可以從大數據攞你需要嘅嘢；又例如用 Whatsapp，唔 share 對話上大數據，Whatsapp 就唔會免費 -- 道理完全一樣，冇免費午餐。）




之前提過有遙控版開關插座，亦響米家 apps 入面控制左右鍵分別對應乜嘢，可以開關屋入面任何一盞燈、開關 CCTV、播音樂、開關冷氣（要買多個冷氣用嘅開關）……




另外，我 set 咗日落時自動開燈，不過由於小米家居未支援香港，要用選深圳為位置。


如果唔鍾意大數據，咁就 set 個時間都得。

暫時寫住咁多，稍後會買多幾件設備，加多啲功能，再出開箱文。

egg_studio

我冇買，不過睇 spec 其實佢係紅外線發射器，可以連上網關，然後 set 自動化功能或手機操作，俾有紅外線遙控的電器用，包括冷氣。

egg_studio

ricedingmeow 發表於 30-5-2019 03:58 PM
請問香港係咪都要用大陸版網關先可以link AQARA開關？很多人說香港版search不到開關。連香港小米客服都話唔 ...

1) 一定要用大陸版網關，而手機上的小米 Home 亦要選擇大陸地區。（用開小米嘅香港人都應該知道，小米最 top 嘅嘢一定唔會放俾香港行版用）

2) 要用 adapter，或者換一個酒店用果種「萬能插面板」。

3) 冇駁上網關（智能家居是用 Zigbee 通訊，唔係用 WiFi），就係普通燈掣。

好奇一問，你裝修時拉多條火線俾智能家居，定用「單火版」？我識有朋友專登搵師傅拉多條線做「零火版」（我用單火版的）。

ricedingmeow

egg_studio 發表於 31-5-2019 12:29 AM
1) 一定要用大陸版網關，而手機上的小米 Home 亦要選擇大陸地區。（用開小米嘅香港人都應該知道，小米最 t ...

多謝指教！

1) 一定要用大陸版網關，而手機上的小米 Home 亦要選擇大陸地區。（用開小米嘅香港人都應該知道，小米最 top 嘅嘢一定唔會放俾香港行版用）
我現在用小米IP Cam都係用米家大陸地區的。網関收到！

2) 要用 adapter，或者換一個酒店用果種「萬能插面板」。
電師傅唔肯同我裝萬能插面板話唔符合香港規格
3) 冇駁上網關（智能家居是用 Zigbee 通訊，唔係用 WiFi），就係普通燈掣。
OK！最緊要確定呢個，裝修時沒有WiFi也可以試到

4）好奇一問，你裝修時拉多條火線俾智能家居，定用「單火版」？我識有朋友專登搵師傅拉多條線做「零火版」（我用單火版的）。

甘你用單火版電燈會不會閃爍？
我現在仲夾緊，因爲一換就全部開關都換，費事兩個樣。燈可以用單火，師傅話有些電器W大一定不能用單火版。我問緊甘係咪全部都拉零綫。

我既不是IT人也不熟水電，師傅又不熟智能野，現在我都頭大中...  謝謝分享！

ShingWong@G

咁樣買要幾銀 ?

egg_studio

ShingWong@G 發表於 3-2-2018 09:08 PM
咁樣買要幾銀 ?

大約：

網關 $135

燈掣（單火版）$185 x 3 = $555
遙控燈掣 $95

溫度濕度計 $75
人體感應器 $59 x 2 = $118

= $978（人民幣）


上文未講，我後加溫度濕度計，用途係？當達某個溫度時，自動開抽氣扇 / 冷氣，當然呢兩件電器都可經手機手動開關。

ShingWong@G

兩件電器要接駁去邊？

egg_studio

ShingWong@G 發表於 4-2-2018 01:00 AM
兩件電器要接駁去邊？

抽氣扇本身駁燈掣做開關，所以換咗燈掣，就可以經網關控制。冷氣就要買一個紅外線發射（未買/未必會買，因為我唔多開冷氣），事關小米未有智能的曲架掣。

此外，上文提到，除小米外，仲有一啲香港公司（同樣國內生產），款式靚好多，但價錢貴好多，都係單火，有興趣可上網 search search "Yoswit"

tomtomtompk

師兄我都買左小米智能墙壁開關，總共有4個位要換，我都想搵個電工幫幫手整

單制版我大概都知點駁，但係雙制版就真係唔知...

我想發個短消息比你，但點解發唔到既@@

egg_studio

唔知點做就請個電工幫幫手，唔好冒險！我都係搵電工牌朋友幫手，我旁邊影相。

hnixonk

其實我好有興趣用佢個zigbee版插座
但個網關我想係香港買...   插壓係大陸版  有無人試過係work的?

egg_studio

hnixonk 發表於 27-5-2018 09:35 PM
其實我好有興趣用佢個zigbee版插座
但個網關我想係香港買...   插壓係大陸版  有無人試過係work的? ...

呢個我都想知

依家小米 Home 要選有 zigbee 賣嘅國家地區先用到，例如大陸。最近一次更新後，香港地區都有網關了，但我未試可否加入 zigbee。

據我問過深圳小米之家，不同地區經嘅 server 不同，對速度（燈掣反應）有影響。

hnixonk

蛋兄你好,  好耐無上黎浦過

補充一下   我趁而家cn小米有discount   買左幾件國內版既智能家居試下  include z
新版zigbee插座with timer & usb   (反正我用左幾年小米mobile)

試左之後再簡略補充一下

egg_studio

咁香港版網關 + 小米 Home 選香港 + ZigBee 得嗎？

higaken

想問一下 單火雙鍵 要點接駁?
我有2條火線(左同右燈)
希望可以解答,感激!

egg_studio

原本燈掣有幾多火線入？連接一個定兩個 fuse？

higaken

egg_studio 發表於 13-6-2018 10:08 PM
原本燈掣有幾多火線入？連接一個定兩個 fuse？

咁樣~ 應該係2條火線 2條燈線, 但小米得一個火線入
我試過2條插晒入去會一開燈就兩盞都著晒~_~"
有無辦法做到 左邊控返左邊燈, 右邊控返右邊燈
希望有方法 研究左好耐 Thanks!!

egg_studio

higaken 發表於 14-6-2018 04:02 AM
咁樣~ 應該係2條火線 2條燈線, 但小米得一個火線入
我試過2條插晒入去會一開燈就兩盞都著晒~_~"
有無辦法 ...

你係一條火線入的。根據你張圖，駁新燈掣時不用駁橙色果一小截電線，然後將藍色駁入 L 位，而兩條紅色去 L1 及 L2。

記得熄總掣先好搞！

higaken

egg_studio 發表於 14-6-2018 10:10 AM
你係一條火線入的。根據你張圖，駁新燈掣時不用駁橙色果一小截電線，然後將藍色駁入 L 位，而兩條紅色去  ...

無藍色線喎,
上面紅色線應該係火線, 左上1條左燈, 右上1條係右燈
所以似係2條

egg_studio

Sorry,唔記得 upload張圖。請看橙色及藍色線。

higaken

egg_studio 發表於 15-6-2018 01:01 AM
Sorry,唔記得 upload張圖。請看橙色及藍色線。

已經成功左, 感激

egg_studio

你個燈掣都有30年歷史嘛

ricedingmeow

請問香港係咪都要用大陸版網關先可以link AQARA開關？很多人說香港版search不到開關。連香港小米客服都話唔一定得。但用陸版網關要加adapter好厚。

另外請問第一次裝AQARA燈制，如果裝修期間未有WiFi同網關，燈制係咪都可以就甘用住先？

新手入門望指教。謝謝！