平價副廠閃燈 美科 MK-320S（S for Sony）-- 測試照片

egg_studio

之前響 A99 用開 Canon 年代遺留嘅副廠大燈，一來全手動，二來機身 + 鏡頭 + 閃燈實在太重，加上遲啲有國內及海外地底之旅，所以平平地買番支 TTL 副廠閃燈用。

幾年前自從 A99 推出，間接推高曬菲林年代的萬能達 AF 鏡嘅價錢，響旺角一支 50mm 1.4 竟然去到三千（雖然不及 X 成 X 成一塊 UV filter 貴）。到 A99 II 推出，坊間一支 2015 年出嘅副廠閃燈突然被夾高，仲要斷貨，結果響淘寶先有得賣（廣州相機鋪）。

其實，深水埗有一間專賣淘寶貨的攝影器材鋪仲有貨，前一排我想響果度買，店員問，你部乜嘢 Sony 機？我答 A99。一代定二代？我答一代。店員話一代唔 support。我奇怪，明明 A99、A99II、A7乜乜物、RX乜乜物果類「近代 Sony」機都用 Mi 介面，冇理由會唔得。我話 A99 之前啲 A 系列用舊插座，但用轉換器都用到喎（根據 Sony 網站資料），但店員死都話唔得。之後，佢介紹我買另一款價值 $18XX 嘅閃燈（$18XX 的話，我加多幾百買原裝好過啦），我睇睇，果支「推介貨」嘅燈腳咪又係 Sony Mi !!!

呢間店鋪我之前想幫趁買腳架，當年店員同我講，呢支腳架唔 support Sony 機！乜腳架都有分？我唔係買自拍神棍喎！呢件事令我想起「 X 成 X 成事件」（另看買 filter 買米唔知價） ，可能我個樣真係好唔 pro 但非常有錢嘅人。

跟住，我行過幾個鋪位，去另一間同樣淘寶 feel 嘅器材鋪。姐姐店員話，呢支閃燈當然用得到（響 A99），不過賣曬啦！

大家可睇得出，點解一間有貨，隔離會賣曬？

鋪名就唔開，不過熟行情嘅應該知道我指邊間，大家買嘢不如響淘寶好過啦。

之後，我 email 問廠家及去外國網站睇睇（始終是 2015 年產品，外國有少少 review，但本地十分少），都肯定可以支援 Sony Mi 介面。先出幾張開箱相，全部用自動唔駛煩，TTL 及後簾完全支援，過幾日國內地底之旅後就分享測試照片。










包裝同時下買電話一樣。

ShingWong@G

唔知依家重有無以前嘅聰明脚？想用返支美施閃燈。

egg_studio

試閃燈首先試試極端環境，幾日前透露，會有地底之旅，響全黑環境下用 A99 嘅 ADI 閃燈模式。
以下照片攝自 712 鈾礦場，有關鈾礦，請另看探險版。


冇閃燈，前方為頭燈，方便我對焦。


ADI 自動，約 5 米範圍補光算充足，亦準確，但 white balance 偏黃少少。



全黑環境，TTL 自動，近攝補光。


亦係全黑環境，TTL 自動。



冇閃燈：有天然光從窗外射入。



同一地點，TTL 自動。

egg_studio

ShingWong@G 發表於 19-3-2017 07:03 PM
唔知依家重有無以前嘅聰明脚？想用返支美施閃燈。

我對閃燈冇乜研究，唔清楚聰明脚問題，我叫版主答你啦。

Homan

留意你支燈比較矮身，用 ultra wide 個遮光罩會遮左下面D光