鶴藪、紅花嶺路、坪洋、老鼠嶺、山雞湖 -- 新春村路行大運

egg_studio

新年過咗幾日，先有時間出車。出車時被長洲 XC 比賽參賽者認出，佢問有乜村路好踩，咁就介紹一下新年輕輕鬆鬆嘅路線。


響聯和墟出發，有時間可睇吓聯和墟舊街市（聯和市場） -- 早前出了一篇文，有興趣可睇：聯和墟街市的今與昔 — 街市的中央，其實不是街市



大約兩三年前，呢處仲係爛地停車場，轉眼間入伙了。



沿單車徑轉入村路，好快去到龍躍頭。有關龍躍頭，又可以睇睇大笪地領導嘅橙新聞專欄：【型男攝影師 | 行山記】新界圍村半日閑遊 龍躍頭懷古風！



今次話明行村路，所以不入龍躍頭，經東閣圍村路走。咁啱有人問路，點去流水響，指路後唔記得影番張東閣圍。



離開東閣圍，係一片廢田。



去到布格仔，大家認唔認得呢度？就係皇后山軍營，依家變緊做公屋。



上少少斜坡，去到流水響，迴旋處轉入鶴藪。



單車當然唔入得鶴藪水塘，但閘口前有一條郊遊徑，係可以踩單車嘅。




呢條路有幾條分支，不過大家最後會出番沙頭角公路，點都要過一過馬路。



大家有機會，幫趁吓呢類鄉郊酒樓，一定好食過大霧山果啲。



之後經大塘湖進入「紅花嶺路」-- 好多人搞唔清，「紅花嶺路」及「紅花嶺軍路」係兩條路 -- 「紅花嶺軍路」係上紅花嶺（正名「麻雀嶺」）嘅英軍舊軍路，而「紅花嶺路」係一條林蔭村路，不過依家果度起緊香園圍邊境通道，挖緊隧道，所以改路改到七彩。



遲啲響九龍坑揸車經隧道嚟到呢度。



打通咗嘅隧道……探險版會員：唔駛諗，有好多部 CCTV 及看更。



轉入禾徑山路，停一停長山古寺。（另看：粉嶺北區文化古蹟單車遊）





禾徑山路又係因為起緊香園圍邊境通道，掘到七彩。



之後入番村路，爬一個小山坡，去到坪洋芒草園。



上去就係「噹噹石」，不過今日見有隊旅行團行上去，費事踩單車上了，留番下次。（「噹噹石」請看：第二及第三階段解禁禁區 -- 一鑊過遊）



沿「踏步徑」落山，入坪洋村。



坪洋陳氏祠堂到此一遊。



去到坪洋，天空放晴，一口氣踩上 XC 路。



竹園村後面，已經好接近深圳。




另一個坪洋芒草園。



之前火燒山，依家光禿禿。



之後踩蓮麻坑路，往老鼠嶺。



從老鼠嶺往恐龍坑，經一條拜山路 -- 呢條路差不多 2 公里，冇田冇屋，只有山墳，仲有好多支路。



拜山路出到恐龍坑 XC 路。



XC 路變靚路 -- 年幾前恐龍坑鋪過新路面，但今日踩 MT bike，所以快快離開馬路。



離開恐龍坑馬路，又入另一條村路，經農田田基路往大埔田村。





大埔田村後，好多人會一早就踩咗出去坪輋路（馬路），但話明踩村路，當然繼續穿穿插插。



又經田基路，過吓木橋，往山雞乙。



呢條田基路頗隱蔽，響相中左面出嚟，接大路往山雞乙。



去到山雞乙，田就冇晒，變成倉庫及貨櫃場。



嚟到山雞乙，當然不能錯過山雞湖 -- 前排某報紙介紹山雞湖，明顯響我網站「參考」資料，但抄都抄錯……依家啲記者水平真係……



山雞湖條大水管去邊？呢度係附近一個入口（portal），但「正式」果個請睇睇：新界原水隧道入口



經過一片草坪，搵個人都冇，繼續踩，離開山雞湖，出番沙頭角公路單車徑，返回聯和墟，完成新年行大運，約走 34 公里。

ShingWong@G

如果行路由上水或粉嶺行去山雞湖大概幾耐脚程？謝謝！

egg_studio

我諗要一小時

egg_studio

初十啟市，經過立刻幫趁！