文錦渡輕鬆遊+試車29er (更新ཨོཾ་མ་ཎི་པདྨེ)

GroupWebike(@G

尋日有機會約左老豆踩車！
而前幾日就預先做好功課，帶佢去行下第三次解禁地區
對佢黎講香港大部份地方都去過，但因為禁區關係，當佢聽到都好有興趣去行下！
順便試下部29er

於是由元朗出發，途經XC單車徑去到上水


雖然單車徑入口有極大量斷竹同樹枝，但29吋巨輪卻如履平地！


老人家亦踩得好開心


但中間路段出現不少倒樹既「落腳位」
相對半年前，實在唔好行


中途出現似泰文既字句



經網路查閱, 原來唔係泰文, 而係藏文
ཨོཾ་མ་ཎི་པདྨེ་ཧཱུྂཨོཾ་མ་ཎི་པདྨེ་ཧཱུྂ
同西藏布達拉宮外一塊岩石上寫既一樣
意思係唵嘛呢叭咪吽唵嘛呢叭咪吽


然後到上水經虎地坳去文錦渡


檢查站現已變成地標

（此圖為29、26吋合照）

轉入沙嶺道


往左走，然後等陣會行埋右邊


左邊係一條唔算好斜既短坡


另一個角度睇




新車架响爬坡時用較重腳／低踏頻
好明顯會感覺到車架「左、右搖擺」
我稱之為「架車教你點踩」
同以往踩過既根本係兩回事

上到去觀景非常開揚，附近一個個唔太高既山丘
於是乎停車影相


一黎到呢度，就覺得十足十拍古裝既取景地點






深圳近在咫尺






深圳既梧桐山


再向前行就會發現一個直升機坪


隱約見到個H


直升機坪正係今日第二個景點 - 二級歷史建築「麥景陶碉堡」


全香港共有七座麥景陶碉堡，主要用作打擊跨境罪行及反偷渡之用而隨著時代變遷，警崗而由人手值勤轉為以電子監察系統運作



蹺過入口，會見到堔圳在腳下


碉堡似乎並無人看守
主要用閉露電視監察


睇完碉堡返轉頭行另一段路

終點係三個既山墓，老豆形容為「風水非常好」、「涼浸浸」

依沿路出文錦渡，到達第三個景點 - 中華巴士屋




入口並無上鎖



似乎能夠搵到「生活痕跡」



因為附近其實有居民居住


然後去白虎山, 反而去左缸瓦甫路


缸瓦甫路當日非常清優, 一路上上落落好幾個山頭
每個都唔高, 有得踩又有得抖
而且有樹陰有太陽有風
非常舒服!


呢度相信好多意外!
一個彎棟左5個警告牌!


由大路一路行會漸入小路


原來呢度就係越野電單車 / 四驅車勝地 - 恐龍坑
當日亦有 越野電單車 / 四驅車 練車


岩岩可以比我試下車
試左幾條有信心可以上既
目測有難度, 但事實係同白泥上菠蘿山感覺差唔多
而新車雖然軚未開好, 但亦能夠踩上黎




繼續跟車軚痕走, 又有一段短XC路


但四處搵唔到路出去
唯一似樣係呢條!


天無絕人之路, 所以我响山頭外圍轆左個圈, 睇下有冇路可以往下走
一直無發現, 直到聽到蛇叫, 所以為免危險, 決定由原來折返

回程去羅太食牛腩飯, 薑汁豆槳溝豆花
然後經牛潭尾軍營


經元朗再去屯門
完成探路加試車既一日, 全程約60公里


後記:

新車一試之下
發覺同之前G牌有差天共地既分別
唔知呢D係咪某大笪地高層所講既「如果剩返G牌同M牌2個牌子揀, 寧願跑步」


踩既時候有感覺到五通有輕微郁動, 只要跟住呢個節奏, 踩既時候非常輕鬆
要形容的話, 我覺得車架比較似「木頭」既彈性
特別係上級落級時既感覺, 前轆因為前叉關係先忽略
後轆勾起時有似彈弓既感覺, 但又唔似軟架有似泥沼裡面跳之後先彈起既「反應遲延」
當然呢個可能係軚氣少既關係

軨方面, 經老豆講解, 原來我呢對係28線軨, 而且鋼線唔係7字條, 而係直條
鋼線同鋼線之間只有「Hub到框」既「拉力」
冇鋼線同鋼線之間既「頂力」
或者會冇咁硬淨, 可能容易變形
但相對彈性可能會好D
而且「溜」方面發覺29"新軨 竟然大輸26"幾年冇換油既XT軨
未知係軨問題定軚問題
前叉吸震能力並不滿意, 未知係未set好定軚氣不足影響, 覺得似乎落地時「太硬」, 承受完撞擊之後又「太彈」

DominicNg@G

在恐龍坑上，係有一條隱藏的小路下山，如果曾有電單車轆過，路線更明顯，出口是蓮麻坑路。

GroupWebike(@G

之前睇多米兄同蛋兄分享有提及過, 但眼下既路都唔適合落, 下次一個人再去睇睇

egg_studio

好多圖、好詳細！

有幾樣嘢要回應：

• 阿世伯可以跟你上到沙嶺及恐龍坑山，果然老當益壯！
• 屯門至上水越野單車徑我都有幾個月冇行，原來有咁大變化！
• 恐龍坑山落蓮麻坑路果條 XC 路，你可睇番我 share 嘅 GPS。係幾難搵，但 29" 巨轆可踩到。
• 缸瓦甫路大約兩年前先有街燈（你可睇番我幾年前夜遊恐龍坑啲 posts），所以會有咁多警告牌，因為夜晚真係乜都睇唔到！
• 「如果剩返G牌同M牌2個牌子揀, 寧願跑步」-- 呢句說話依家依然係事實 -- 當踩過鴻富車架後，更加證明台灣嘢冇好嘢。
• 至於新架「重腳」，可能你冇留意，當從 26" / 27.5" 「升級」至 29ER ，前餅應該按比例買細啲，例如以前係 27.5" 配 32T，咁應改為 29ER 配 30T，否則會重腳，但會練到好體能。（我去南非前，訓練係用 29ER 配 36T；比賽時轉番 32T）
• 「溜」方面…… 29ER 車轆因為大咗（條呔亦重咗），所以轉動嘅慣性 / 動量大咗，因此「溜」車（及起步）係會慢過細轆，所以你要習慣吓，停車前轉大一兩個波，方便起步。
• 反而世伯講 7 字線同直線嘅分別，我又真係冇諗過。我用 7 字線，只係貪平、易配、選擇多，冇諗過「拉力」「頂力」問題。真係要多謝世伯指點！
  

GroupWebike(@G

阿世伯以前成日操, 記得2年前我第一次踩車就帶左我上荃錦坳, 當時到左荃錦段就開始推車, 推左一半
而佢中餅帶32行完
所以到左搭車只須2蚊雞既年紀, 仲可以同我地班後生上波波, 環塘
不過年紀大眼力差, 回氣冇咁快, 都係ONROAD爬坡練下體能踩下抖下為主
有見過同年紀既老人家, 真係差好遠, 所以話運動好重要!

「屯門至上水越野單車徑」之前我形容為蝕頭蝕尾賺中間, 當日一行, 蝕足全程, 下次應該會改行「牛潭尾越野單車徑」

恐龍坑山落蓮麻坑路, GPS加實景地圖, 好明顯見到路線, 但同老人家唔行呢度, 留下次先, 到時再搵搵
新架重腳係指重腳時比較感覺到左右搖擺幅度變大, 可以利用五通搖擺. 反而輕腳高腳頻就有冇乜感覺.
之前有計齒輪比有計埋車輪大細, 所以最後組合同以前比較差唔多

egg_studio

咁 "唵嘛呢叭咪吽唵嘛呢叭咪吽" 即係點解？

egg_studio

GroupWebike(@G 發表於 18-5-2016 02:03 PM
阿世伯以前成日操, 記得2年前我第一次踩車就帶左我上荃錦坳, 當時到左荃錦段就開始推車, 推左一半
而佢中餅 ...

如果「上水至屯門 XC 徑」唔好玩，可試試「拜山場」（另看：http://www.photomarket.hk/forum. ... C%E5%B1%B1%E5%A0%B4）

GroupWebike(@G

唵嘛呢叭咪吽係「六字真言」
叫得真言就知道好勁，好在我地都有「四字真言」

「拜山場」半年前到入口打算探路，有隻一狗响入口，一見到我就狼叫（無錯，係「岳」高頭向天嚎果種）
跟住門後有5、6隻狗衝左出黎，小弟隨便掉頭，所以暫時都未去過
但事隔半年，的確可以再去睇睇