蝴蝶山--箕勒仔--蕉徑越野單車行

egg_studio

大笪地單車版嘅 香港越野單車路線一覽表（非官方，但合法路線）update 中 ，介紹其中一條非官方但合法單車路線「蝴蝶山至蕉徑」。冇踩一兩年，今日趁有時間，快走一轉。

呢條路雖短，但頗考驗體能及技術，適宜有經驗 MT bike 車手。另外，此路線唔屬於郊野公園，而屬於北區區議會管理，雖然 MT bike 可合法使用，不過一定要留意係，蝴蝶山平日及假期都十分多行山及晨運人士，因此必須慢車，及禮讓行山人士。

 
頭段 100% 上山。一開始係 40 度上斜。由於地面濕滑，後轆空轉，被迫推車上山。


 
過咗推車路後，斜度減少，但仍要繼續上山，當中有小部分路段較為平坦，可借勢休息。


 
上到約 200m 高時，要抬車上山。


 
樓梯直達至 265m 高之蝴蝶山。然後沿石屎路繼續上山。此段石屎路十分輕鬆，有幾個 scene point 及涼亭可供休息。


 
山下粉嶺、上水一覽無遺。深圳市區亦清晰可見。


 
亦見丙崗、實驗農場一帶鄉郊路線。( 香港越野單車路線一覽表（非官方，但合法路線）update 中)



唯一一段需要抬車落山......真係好斜，加上地濕，買架 downhill 先敢踩。



又繼續上山。如果唔想抬車，可轉入右邊小泥路，踩遠少少，最後可以駁番原路。


 
山徑上，一個荒廢戰壕。


 
過咗戰壕，就會見到漁護署警告牌，前路已屬郊野公園（林村郊野公園），不可踩單車。


 
大笪地係唔會介紹非法路線，所以放心。響荒廢戰壕前幾米，有一個路口。


 
有指示石碑表示往上水。MT bike 請轉入此路，切勿進入郊野公園範圍。（可見唔同部門管理嘅地方，連指示牌都有唔同風格）


 
一轉入去，即見好靚嘅 XC 路。記得唔好衝得咁興奮，要小心行山人士！


 
繼續踩。


 
再繼續踩。


 
之後會見到分叉路。轉左落樓梯往蕉徑，不過我地係直去上山。


 
踩上一個小山崗，又見另一個戰壕。


 
戰壕旁邊，進入一條好隱蔽嘅路。呢條路十分窄，100% downhill，有幾個小 jump 位，不過技術好的話，可以一口氣落到山腰。


 
到山腰位，突然會入咗密林。繼續落山。


 
離開密林，會去到一個開揚地方，兩邊有墓地。


 
落多一陣，會入村。然後駁出粉錦公路。


 
最後會見到新界名勝之一嘅廣東旅遊。

大張嘅相請睇番我個人相簿。

willywong

原來你特登踩入去廣東旅遊，失敬失敬

egg_studio

行過哥呼嶺點可以唔去廣東旅遊呢。

alexphoto

點解會有間旅行社係d村屋入面? 究竟係乜來?

egg_studio

alexphoto 發表於 13-8-2012 06:11 PM
點解會有間旅行社係d村屋入面? 究竟係乜來?

你真係有眼不識泰山......上水咁出名嘅哥呼嶺廣東旅遊都唔識!

Homan

egg_studio 發表於 13-8-2012 11:09 PM
你真係有眼不識泰山......上水咁出名嘅哥呼嶺廣東旅遊都唔識!

全程大約幾長呢？
以版大的技術要踩多久？

egg_studio

Homan 發表於 14-8-2012 08:58 AM
全程大約幾長呢？
以版大的技術要踩多久？

上山考體力，落山考技術。

如果淨計蝴蝶山--箕勒仔--蕉徑（因為我落山後再踩咗幾段村路），約一小時內可完成。(我上次踩吓停吓影風景，仲要去旅行社，所以不能作準，你可參考我個 GPS)

egg_studio

補充：

上蝴蝶山中段時，要抬一段樓梯，但早一年半載時，區議會響蝴蝶山徑起咗個涼亭。當時為了用機車運 d 物料上山，響樓梯旁邊開咗條 S 形山路。雖然同樣極費體力，但多個選擇。

另外，響長瀝附近見到村民自建一個越野電單車場 -- 面積唔大，村民自得其樂。

willywong

自建越野電單車場...下回帶小弟參觀

Homan

willywong 發表於 14-8-2012 03:56 PM
自建越野電單車場...下回帶小弟參觀

我唔係山地民，我想問我夠唔夠玩？

egg_studio

Homan 發表於 16-8-2012 01:45 AM
我唔係山地民，我想問我夠唔夠玩？

其實新手應該先去大帽山兩條越野單車體驗徑，攞咗踩越野單車感覺後，去環塘走幾轉，因為環塘可算係難度唔大嘅路線。之後先諗其他有難度及考驗體力嘅路。

willywong

Homan 發表於 16-8-2012 01:45 AM
我唔係山地民，我想問我夠唔夠玩？

唔明「夠唔夠玩」是指什麼?

Homan

egg_studio 發表於 16-8-2012 09:04 AM
其實新手應該先去大帽山兩條越野單車體驗徑，攞咗踩越野單車感覺後，去環塘走幾轉，因為環塘可算係難度唔 ...

好… 多謝你好婉轉答左我… 我係唔夠玩呢條線…

egg_studio

Homan 發表於 16-8-2012 09:36 AM
好… 多謝你好婉轉答左我… 我係唔夠玩呢條線…

因為運動係真正要落場玩先知得唔得，上網齋問唔試，我都唔知點答你......