香港公開試出貓方法

神秘人

前排有條大陸槍手比人帶左,而我有fd做過幾年監孝員,話要借我acc分享下出貓方法！

下底轉述自我 fd 超級神秘人:

---

我有幾年考評局會考及高考監考經驗，亦試過響 HKAL 捉到出貓及唔熄電話個案，響行內可以講係盡責、全面嘅監考員。

有見及此，分享幾項可以出貓嘅辦法，不過呢個唔係教考生出貓，而係希望有關當局可以正視問題，堵塞漏洞，令考生冇機會成功。

去廁所：現時考評局之公開考試制度下，冇限制考生去廁所時間及人數。考生只要向監考員舉手，簽完名（有本紀錄簿響試場門口）就可以自己行去廁所。當中響廁所可以進行以下活動：

• 打電話問人 / 上網查資料：考評局「默認」每名考生只有一部電話，因此只要求將一部電話放響櫈底。所以，響廁所時，可以用另一部電話打電話問人。而試場主任及考評局亦唔會檢查去廁所簽名紀錄。
• 響身上取出筆記閱讀：雖然《考生須知》註明不可攜帶筆記或紙張響身，但實際上，同電話情況一樣，監考員根本冇可能搜身去確認考生身上冇筆記等資料。
• 智能手機：曾經見過有考生將成本筆記 scan 後，以 PDF 形式儲存響手機內。
  

請槍手：這是最普及的方法，因為「市場」上有需求，有價有市、明碼實價。技術上，考評局之公開考試制度下，監考員必須檢查考生之身分證及准考證，而兩者都會有照片，理論上好難冒充別人。但實際上，有三大漏洞：

• 中學文憑試大部分考生都未夠十八歲，仲揸住兒童身分證。個樣同依家十六、七歲完全唔同晒。
• 學校考生須於准考證上貼上「近照」。所謂「近照」，好多學校都係用學生 Form 1 入學時果張細路相。
• 監考員責任心：過去監考所見，大部分監考員都係對一對身分證及准考證上姓名是否一致就算，唔會主動睇吓考生果樣。另一方面，考試期間，考生 dup 低頭做卷，根本唔得閑俾個樣你睇；二來監考員以為做好心，唔好騷擾考生。所以請個年紀差唔多嘅槍手，好容易過到監考員呢關。不過，我都試過因為考生果樣真係差太遠而要佢地停一停筆，抬起頭檢查。所以，奉勸各位考生，准考證上面一定要貼近照，否則蝕底一定係自己。
  

聆聽考試：現時聆聽考試以香港電台向全港廣播，因此理論上所有人都唔知試題，包括槍手。不過，槍手亦一樣有辦法出貓：

• 考評局容許帶一部以上收音機入試場，原因係其中一部壞機時，考生可即時換機。出貓方法係，考生將其中一部機改為接收器（換殼），好似對講機咁，收聽場外槍手之即時傳譯。而槍手則於場外一面收聽香港電台廣播，一面作即時傳譯。
• 幾個相識之考生，約好時間於聆聽材料播放完畢後，響廁所交換答案。由於中學文憑試以水平參照評級，因此多幾個人考得高分，彼此不會被拉低，對大家都有着數。不過，聆聽材料播放完畢至完卷時間有限，必須要快。
  

以上方法屬最簡單及低科技方法，若牽涉鴨記，仲有幾個「高科技」出貓方法，下次再講。