炎夏九龍坑山單車遊

egg_studio

今日炎熱天氣警告，最啱練體能。趁中午最熱時，踩上近年單車界幾熱門嘅九龍坑山。

九龍坑山位於大埔及粉嶺之間，其中有一小段與衛奕信徑重疊，不過重疊位置不屬於郊野公園，車手可以放心。起點響九龍坑村，沿長命斜上至氣象站，雖然路程較上大帽山氣象站短，不過難度比較高，因為全條山路都係浮沙碎石，而且斜度較大，類似上年大笪地單車團去過嘅華山。

冬天時上到山頂約半個鐘，不過今天實太熱，所以踩咗成一個鐘先到。

今日趁炎熱練體能不止我一個。上山時遇到幾十隊 PTU ，每人背住 2L 水上九龍坑山。差不多到山頂時，見到一隊特別快、特別 fit 嘅 PTU -- 單車上山點都快過用腳 -- 所以稍後先響山頂見番佢地，及幫佢地影相 (應該係用嚟做 reference，證明佢地已到了 check point) ，佢地知拋離第二隊差唔多半小時，所以乘機響山頂抖抖。PTU 繼續向康樂園進發，而我則沿路折返。落山就當然爽，不消十分鐘就返到山腳。


於山頂飽覽大埔。近處中央為大埔工業村，左邊是吐露港，右邊是大埔市中心，右上角可見大帽山氣象站。最右邊的石屎山徑為衛奕信徑第八段，而第八段與第九段之接壤正是我影相的地方。對岸正中的高山是馬鞍山。


中間的山徑通往沙螺洞；左邊的山徑就是漁護署形容 "極費力難行之山徑" 的衛奕信徑第九段 (上八仙嶺)


最 fit 嘅 PTU 小隊繼續操練，向康樂園進發。


通往沙螺洞的山徑位於氣象站後，十分隱蔽。


九龍坑山氣象站