幾好的台式齋店 -- 素食一家簡評

egg_studio

前幾日經過洗衣街，幫趁咗素食一家。

環境一般，宗教色彩包裝，不過一睇 menu，又肉又魚，就露咗底，所謂宗教，應該係為咗吸引 d 初一十五要食齋嘅顧客。

食物賣相及種類，就有好強烈台式素食。味道方面，一路睇相一路講。


南瓜翅及雞絲翅各一碗
味道一般，冇驚喜。一食就諗番先一兩年大家樂好鍾意賣嘅魚翅瓜魚翅，而且大家樂果 d 略勝一籌。




菠蘿生炒骨
呢味係齋鋪常見，因為唔難整，將麵筋炸咗，用罐頭酸甜醬炒，一般都唔會走樣，不過素食一家就炸過龍，酸甜醬味道同預期有少少出入，不過整體都算好食。




紅米炒飯
我第一次試用紅米去炒飯，因為紅米米身硬，食落口夠乾身，十分不錯。




東坡肉
一般做法都係麵筋加東坡肉汁 (當然又係罐頭)，但佢竟然有煙肉味？！

至於 end up 好唔好食，我覺得食齋就唔可以投訴整得冇肉味，所以東坡肉有煙肉味對我係冇問題。相比廣東齋，成碟拼盤都係用麵筋整，廣東齋做到雞、鵝、叉燒三種顏色三種味。而素食一家兩味都係麵筋，味道變化唔大。

最後，平心而論，食物方面，叫咗二人餐，埋單百六左右，以價錢食物質素計，唔算貴；假如食慣廣東齋，不妨試一試，不過個人都係鍾意廣東齋多 d 。

Homan

個人極愛廣東齋紅色的酸齋～～ yummy~~