通菜街村上鐵板日本料理 (任食)

egg_studio

早幾個星期到 MK 通菜街村上鐵板日本料理食放題 (任食)，呢間所謂「鐵板日本料理」已經冇咗鐵板，只係齋做放題。價錢一般 MK 放題價 (約 $160/位 -- 兩小時)

食到咁上下先發覺呢間嘢原來係青葉日本料理旗下，響某時薪$70打手老作飲食網站吹到好ok果間。如果一早睇到就一定唔會行入去。不過，就係因為睇唔到，先發現呢間整體都ok。



刺身方面，因為對挪威養三文冇乜興趣，所以除三文外，樣樣叫 d 試下。放題吞拿魚，當然唔會比好嘢你，不過以任食嚟講，吞拿值 80 分。其他 d 貝、尤魚、蝦等就新鮮。



燒三文就唔夠肥，一般一般；燒牛壽司就反而 ok，因為唔係和牛，反而有濃郁牛肉味。(我對和牛冇乜興趣，因為平貴和牛都試過，個人點都愛美國牛肉多好多，而唔欣賞和牛所謂「入口即溶」、「牛脂味」呢 d 賣點。)



清酒煮蜆及炒牛肉都做得不錯，沒有挑剔。



甜品芋頭栗子餅十分好食，甜度足、芋頭香、栗蓉夠油水。響香港，現在已經好難搵到芋泥，當一吃呢個芋頭栗子餅，突然有食芋泥嘅感覺。

對比上次大笪地毅行慶功宴，響中環果間 XXX (唔記得寶號，請 Dash 隊員後補)，村上鐵板寬敞得多，至少可以坐得舒舒服服咁食嘢。食物方面，選擇都比中環 XXX 多好多，雖然兩者質素相若，但對比價錢及環境，除非唔駛錢，否則冇理由幫趁中環 XXX。

Homan

呵呵. 咁我地幾時再約埋食一次？

egg_studio

MK 食飯幾時都得

hongdonald

中環個間係大喜屋,個人覺得佢既刺身唔錯,但服務質素愈來愈差的確係事實..
呢間搵日試試先

Homan

我地大笪地會員今晚親自一試呢一間餐廳…
唔，未及中環大X屋，但仍然可以算是可以一試之選～



用餐後店長主動要求我們留影，但我們都是公眾人物，故先打簿格～～

hongdonald

頂!前排右二條撚樣想點!
唔使比面佢,整走D格仔!

egg_studio

麻煩整走下排右二條友 d 格仔。

同埋下排右二條友又講粗口，又要扣分。

boxing

多謝師兄好介紹

nangkipo

好像不錯
多謝推介