古兜温泉兩日一夜簡評

egg_studio

前個星期到新會古兜温泉浸咗兩日一夜，嚟個簡評俾大家參考吓。

古兜温泉幾年前裝修過，不過現場觀看，唔講得上係豪華，不似得近幾年大陸 d 新溫泉咁浮誇，不過乾乾淨淨。



交通方面，我買套票，坐船到一日得一班船嘅斗門港。碼頭冷清，加上我去果陣未係旺季，所以冷上加冷清。到埗後搭半個鐘車就到。



房間方面就訂所謂嘅日式房間 (東瀛閣)，其實一早已知應該冇乜日式裝修，但東瀛閣嘅優點就係響溫泉入面。響間房行出去就係溫泉。如果訂平百幾果隻房就要搭接駁車或行 10-15 mins 去浸溫泉。



另外有邊最新落成嘅酒店，叫唐宮，不過果度冇雙人房，如果 5-6 人一齊去就建議訂果邊，因為最新及十分靚。

古兜温泉屬天然溫泉，分咸淡兩個泉眼。不過淡水泉眼果邊裝修緊，因此今次只係浸過咸溫泉。咸溫泉冇乜特別，因為原理只係海水入咗地下，變成溫泉，因此主要礦物質係鹽，比較之下，北少少果 d 溫泉，例如從化溫泉等 (硫磺)，古兜就冇乜所謂保健作用。



去之前，我都 search 過有乜好玩、好食。溫泉附近係乜都冇，離最近嘅名勝小鳥天堂都成一個鐘頭車，而且我已經去過十幾次，所以呢兩日一夜已經計劃留響溫泉玩。咁有乜玩？其實冇乜，除浸溫泉外，古兜有個水上樂園 "歡樂水世界"，但冬天唔開。 "歡樂水世界"後面有個小水庫，風景冇乜 (當見過萬宜水庫後)。另外有個山仔可以行吓。

但其他網站大部分人都話古兜其中一間餐廳好好食，所以第一餐就去幫趁。唔食由自可，一食唔得掂！結果三餐都係響果度食。


炒椰菜花 -- 隔離枱食完一碟再叫，最後食咗三碟，所以我又叫嚟試試。呢碟菜好簡單，清炒，但十分超級好食。待應報稱 d 菜係響溫泉裏面自己種，而形狀同平時響香港見果 d 唔同，而味道就好鮮甜，簡單用少少油一炒就好好食。


四寶豆腐 -- 又係報稱自己整嘅豆腐，非常滑，而包響荷葉入面蒸，滲入荷葉味，清清地又幾好食。


呢隻雞雖然個樣有 d 80後，不過大陸走地雞 (又係報稱溫泉自己養)點差都一定好食過農場雞。呢隻係荷葉雞，係兩日一夜裏第三隻雞。頭一隻係白切雞，味道及肉質已經十分之走地。第二餐叫咗隻沙羌雞，反而雞味被沙羌奪咗。第三餐試了呢隻荷葉雞，荷葉包住春雞，細細隻夠入味，而荷葉味不濃，唔會搶了雞味。

willywong

好邪,你啲相除咗雞的死屍外,真係一個人都冇

Homan

正呀. 可以組團去泡…

egg_studio

當日雖然係 weekend, 但唔係假期，所以真係一個人都冇。

響斗門港落船有兩 group 香港套票客，一班去海泉灣 (新 d 、貴 d 、遠 d)，另一班包括我地就係去古兜，大約有十人。當去到古兜有大約唔夠一百位大陸客，不過佢地唔係過夜，所以大約黃昏時成個溫泉就得番呢十幾名港客及幾十名大陸客，因此可以一人一溫泉，又靜又唔迫。

zoneonezone

d設施同環境都好似Ok喎, 全程用左幾錢? 貴唔貴?

Homan

... 呢隻雞雖然個樣有 d 80後 ...
egg_studio 發表於 19-12-2010 11:01 PM

我想知一隻雞點解會可以令你感覺「有D 80後」？

而我覺得隻雞好2036啵…

wongfai

好邪,你啲相除咗雞的死屍外,真係一個人都冇
willywong 發表於 20-12-2010 12:07 AM

第五張咪有人囉....

Homan

回復 7# wongfai

咁細心... 咁都睇到...
第六張係唔係都有呢？

egg_studio

回復 5# zoneonezone

套票約 $1500，及兩個人來回船飛 (中港城 <-> 斗門)、雙人房 (所謂日式，其實重點係響溫泉隔離)。另外大魚大肉約$100-$150 一餐，按摩正常大陸價 (深圳以外地區)

wongfai

回復  wongfai

咁細心... 咁都睇到...
第六張係唔係都有呢？
Homan 發表於 22-12-2010 07:38 PM

駛鬼細心咩,盲既都望到啦..... 第六張水上樂園滑梯咪有三條友響道滑緊落黎囉.....