轉載：少年不識愁滋味

egg_studio

呢篇文章講出我對依家 d 80後及"大學生"的睇法，亦間接反映出 80後及"大學生"被某 d 傳媒利用為政治宣傳嘅工具嘅情況 (雖然有 d 人未必同意呢點)，但我轉載呢篇文章嘅原因係，佢竟然係生果日報所轉載！！

轉載自蘋果日報 5-5-2010, 蘋果日報再轉載自 http://hkliberty.wordpress.com

「政府唔幫我哋置業，我哋遲早要瞓街囉！」阿光滿腔憤恨，有時候，下的結論難免情緒化。「唔買樓」世民真心問：「其實你可以租吖，點解要瞓街呢？」「租金不斷升，人工又唔加，你話我哋可以點？」阿光總算講出問題核心。「老實講，我都覺得香港房屋福利，可以做得更加好。我諗香港人都唔會反對有一定嘅房屋福利，只不過，幫人置業，好似有啲過態喎？」「點解唔可以要政府幫人置業？」阿光挑釁地問。「你哋嘅講法，即係等於話，交通費貴，政府就要幫你哋買私家車。哥仔，咁嘅諗法會唔會有啲問題？」「你哋唔贊成政府干預吖嘛，我知。不過，你哋知唔知我哋有幾慘？」「慘？」世民終於按捺不住，「社會畀你哋有教育機會，家入大學容易過以前。你哋 30歲未到，已經話政府要幫你哋上車？以前，邊度有人覺得政府有責任幫 30歲未到嘅大學生上車？」「我哋讀大學，要畀學費 o架！」阿光還擊。「讀大學當然要畀學費啦！又想食免費午餐？你哋知唔知，如果無政府資助，你哋根本畀唔起學費。納稅人資助你哋讀大學。你哋讀完，搵唔夠，又要納稅人資助你哋買樓？哥仔，請問，納稅人欠咗你哋乜嘢？」

「呢啲係社會公義！你淨係識得講納稅人，你有無諗下我哋？」「公義？你讀乜嘢書 o架？公義，本來解釋，就係每個人得到自己應得嗰份。邊份係你應得？」面對這種歪理，世民佛都有火。「香港官商勾結，乜都畀大財團玩晒，我哋邊有機會去攞返自己應得嗰份先？」阿光和一眾年輕人，面對任何問題，總有一個很方便的答案。「無錯，香港有官商勾結，財團亦非常有影響力。不過，唔該你無鏡都搵盆水照吓！你又唔係做生意，學乜人講畀大財團玩晒？你如果係小型發展商、二線財團，或者做小生意，批發零售乜都好，你咁講，大家會同情你。唔該你，做好自己份工先。到咗有朝一日，你真係有條件講香港畀財閥玩晒嘅時候，你就唔會覺得上車置業要政府幫。」

Homan

呢篇野正啊！
我最不欣賞（其實不一定是80後）這一類濫褔利主義的人！

egg_studio

呢篇嘢我又唔覺得非常特別，只係佢竟然會響蘋果日報登出來先夠奇特。

因為我又係諗陰謀論 -- 難道蘋果日報唔打算繼續用果班 "大學生" 及 80 後 製造"民意"？因為果班 "大學生" 及 80 後好似唔多聽話 -- 例如無端端另起爐灶參加補選，同果班社民連畫開界線，而早前果班反高鐵 80 後又突然間冇咗聲氣 (可能大學要考試 ，或者佢地 d 米飯班主 cut budget) ，至近排又捧咗班 "買唔起樓嘅大學生"出嚟，但普遍輿論及民調都唔支持佢地。(我有留意 Now 果 d 輿論節目，連 Now 都唔太支持呢班 "買唔起樓嘅大學生")

aaroncslee

冇話特唔特別, 不過講得好有道理, 自己都未付出過, 點解可以咁厚顏無聊咁話人地欠左佢地呢?
依家嘈買樓, 政府如果怕左佢地出手幫, 日後就會衍生出更多無理要求,
如果政府開左個先例, 日後想say no都幾難,

希望政府唔好亂發綜援之後, 又做第二樣對香港及納稅人百害而無一利的蠢事啦~~~~

Kendall_One

曾特首今次都順應民意搞個公開諮詢政府支助市民置業的大龍鳳出黎，又即管睇下呢場吹水會可以搞幾耐。