「愛麗斯夢遊仙境」簡評

egg_studio

買飛前要知道，呢套係細路仔戲，如果要睇得安樂，最好選英語版，同深/午夜場。

如果你介意有可能會知道結局，咁唔好繼續睇呢個 post。

由於係細路仔戲，個故事好簡單，就係愛麗斯去咗夢遊仙境。全片主線上沒有伏線，亦無高潮疊起。唯一叫得「伏線」嘅，就係 Johnny Depp / 導演 / 編劇為咗 (應該係) 向 MJ 「致敬」，所以響故事開頭無端端整條與故事無關嘅「伏線」，不過我唔係 MJ 迷，我唔覺得精采，反而覺得幾核突。

故事 -- 無，所以冇得評，唯有評畫面。

畫面色彩豐富，起初對 Wonderland 描繪得指細，不過到中後段似乎唔夠 budget ，畫面開始越來越少嘢。例如開頭有唔同環境，如森林、沼澤、廢村，每個地方都描繪得幾靚 (純以視覺效果看)，細緻到煙、灰塵、花穗都照顧到。但中後段成日得個天空，尾段仲要全黑冇背景。同時，最尾決戰場面 d CGI 水平明顯同開頭完全唔同，盡其量屬 B 級片水平。

由於係 3D 戲，有 d 鏡頭係為 3D 而 3D，但數量不多，處理手法自然，可以接受。雖然我仍然覺得最好睇嘅 3D 係「咒樂園」入面李蘢兒個胸彈出黎先可以發揮 3D 電影的震撼力。

呢套戲令我想起幾廿年前果套「魔幻迷宫」(Labyrinth) -- 即係大衛寶兒果套、明珠台無限重播嘅每月鉅片。兩套電影相比，故事 (同樣係去 d 天馬行空嘅地方/空間冒險)、畫面 (色彩斑斕)、趣味創意 (「魔幻迷宫」仲有迷宫及迷題)，就算女主角個樣，「愛麗斯夢遊仙境」都比唔上「魔幻迷宫」。

另外又記起一隻電腦 game, 叫 American McGee's Alice。個 game 嘅創意亦比此電影高，畫面唔輸蝕。

睇番導演，原來係 Tim Burton。如果將當年果套 Batman 同「愛麗斯夢遊仙境」比較，發現可能係因為 budget 關係，製片搵咗另一條友拍，然後封番封利事比 Mr. Burton，再掛佢個名招搖。

成套戲故事唔 ok、畫面虎頭蛇尾 ------ 不過結局係條大毒蛇 -- 雖然我愛國，愛共產黨、唔愛 80 後，但個結局真係好怪異。我唔知點解 Hollywood 繼 2012 後又黎「中國概念」，夢遊完仙境都要講中國好，今次仲要中國好、香港好，而呢個結局又唔係同個故事有連系。