請小心 -- 蘋果搵車快線介紹的單車路線害死你

egg_studio

今期搵車快線 (壹傳媒果本車書) 介紹幾條單車路線，雖然我不是資深車手，但都要向各位車手發出警報！！

先睇睇內容 (節錄 《交易通 -- 搵車快線》933 期 )

絕景！隱世草原
好多人都知西貢、西沙一帶風景優美，間唔中仲會揸架車入去郊遊吓，但你知唔知深涌喺邊？深涌其實喺西沙路水浪窩轉入榕樹澳再入嘅一條小村，冇車路，只可以搭船或者步行入去。好複雜？但只要你見過深涌嘅風景，你就會覺得複雜都係值得嘅！

駕車人士可以先將車泊喺水浪窩嘅免費停車場，然後就可以沿入榕樹澳嘅行車路起程。呢段行車路有成 3.9km，行路要成 50分鐘，但踩單車就 15至20分鐘搞掂！不過要踩得小心啲，因為呢段路講明唔踩得單車 o架，唔想犯法就推入去啦！呢段路初段有個小草地可以野餐又有廁所，可以 hea住行。

入到榕樹澳，路旁就有個郊野公園路牌，清晰指明由榕樹澳入深涌路線，呢條路其實係越野單車徑一部分，即係要有越野單車證同埋踩部越野單車先得！不過事實係條路全由石屎鋪成，莫講話摺車可以入到，小童單車加兩個輔助轆都行得晒！所以好多人都偷雞踩摺車入去。成條約2.5km嘅路雖然比較窄，不過沿途風景勁靚，有紅樹林、有碼頭，踩約半小時就到達目的地，嗰度有成個高爾夫球場咁大嘅草地，定期有居民修剪，見到一定忍唔住成個人瞓落去！深涌仲有幾戶人住同埋有士多，每逢星期六同假期就會開門做生意，有炒粉麵、汽水，連雞粥都有得食，貴就貴啲，不過山卡啦地方想食啲熱嘢，都焗住要幫趁 o架啦！

易踩！$8任食豆品
香港單車徑其實唔少，只不過成日都斷斷續續，搞到好多人踩嚟踩去都只係沙田到大美督，其實大埔到上水都一樣可以 hea住踩，不過風景就唔係海景，而係農村景，呢個時節仲見到唔少未成型嘅桃花樹同菜田，好鬼田園 feel。

只需要將部車泊喺大埔墟寶湖道露天停車場，然後就可以踩單車沿太和路旁嘅單車徑出發，經康樂園、粉嶺，再到上水，有80%以上都係單車徑，而且冇乜斜路，雖然有成 10km咁長，但勝在易踩舒服， 1.5小時就搞掂。終點可以去到上水石上河踩多10分鐘再轉入河上鄉，呢度有間鴻淘豆品廠，全港獨家$8任食任飲豆腐花同豆漿，好多單車老手個個星期都嚟呢度hea，上午出車、下午回程，玩足一日。如果嫌由大埔出發太遠，又可以泊部車喺上水鳳南路停車場，慢踩半粒鐘就可以到河上鄉，點玩都得。

以上資料頗有不實：

• 從榕樹澳至深涌的確係越野單車徑，係要有越野單車證同埋越野單車先踩得。問題係作者話可以偷雞，不過佢應該唔知如果比人捉到有乜後果。假如響水浪窩至榕樹澳條馬路捉到，定額罰 $320。但如果衰響榕樹澳至深涌的越野單車徑，咁就係定額罰 $1500 ，而且一定要上 court。
• 另外踩摺車就算你有越野單車證一樣多謝你 $1500 + 上 court。
• 深涌有高爾夫球場咁大嘅草地因為果度真係一個高爾夫球場黎。
• 太和路開始係冇單車徑，從太和村開始，經康樂園、至粉嶺係 100% 馬路，就算從九龍坑 (幾日前我影山火果度) 入粉嶺都係馬路 + 村路。
• 由上水至河上鄉又係馬路 + 村路。0%  單車徑。
• 單車徑係有，但要響 2015 年先完落成，仲要等果班 "為民請命" 嘅民主派唔反對先有得興建。