隔牆有耳：踩入科大 周秀娜變模知女神

c_Foo

要打爆機，儲經驗值升呢最緊要，唔係分分鐘被人「秒殺」都唔知乜事。 o靚模周秀娜呢期人氣最勁，原本都以為自己夠晒級數打大佬，浩浩蕩蕩殺入大學演講廳，點知俾人哋個教授問兩問就露晒底，唔係唔識答就話人哋條題目好深，學生又醉翁之意，所謂「知識無限講座」，唔知大家學到幾多嘢？

 

猛話「唔明」、「好深喎」

懶理外間抨擊佢未夠班，周秀娜噚日如期殺入科大，擔任科大知識無限講座系列嘅頭炮嘉賓。事先聲明話以「搣時 Look」登場，原來係鬆身衫加超短裙仔，咁嘅 Miss，八方讀書咁耐未見過囉。現場 400個座位 full house，男多女少，至於另一個可以睇直播嘅演講廳就一半都坐唔滿。
演講一開始由嶺南大學教授李小良解讀 o靚模現象，呢 45分鐘演講，令八方體會到學海確係無涯，由《西廂記》講到情色商品化，如果唔係教授搞吓爛 gag，啲學生恐怕都去晒搵周公。卒之輪到萬眾期待嘅 o靚界女神登場同李教授對談，佢一開始表現都仲可以，同教授講話家吓年輕人嘅共通點係冇電腦會死、鍾意睇啲好爆嘅嘢咁，不過當李教授開始講理論，要周小姐分享「喺 intensive moment有冇一種 pleasure」之類嘅問題時，佢就開始啞咗，回應話「好深喎」、「唔係好明」、「你可唔可以問多次？」

 

捧場女學生話失望

去到問答環節，文化學部研究生 Jenny問周秀娜，既然佢講到好了解自己想做乜，出攬枕嘅目的係乜嘢呢？周秀娜就話自己係要同工作人員交代，至於個市場角度，佢都控制唔到，但就死都唔肯講自己嘅「目標」係乜。
好多捧場學生都話對周秀娜呢 30分鐘嘅表現有啲失望， Jenny同八方講，見完周小姐真人，開始明白點解外界會話 o靚模冇腦；亦有學生話以為係周小姐 talk show，點知原來內容咁鬼學術化，李教授講嘢「深到冇朋友」，所以令佢幾失望。
周秀娜卻話科大之行學到嘢，又話李教授講嘢真係幾深。李教授都好有風度，讚周秀娜表現好好，「話好深其實都係一種對談技巧 o架。」

[ 本帖最後由 c_Foo 於 8-10-2009 11:06 編輯 ]

Homan

原帖由 c_Foo 於 8-10-2009 11:04 發表 ...要周小姐分享「喺 intensive moment有冇一種 pleasure」之類嘅問題時 ...

個記者話周小姐唔明，但係咁conceptual的問題，我又會信d記者會明囉… 嚴人寬己就係呢類人…

c_Foo

周小姐讀書多與否我唔清楚, 但係咁既環境表現大方呢點值得欣賞, 各人有長短, 梗係攞別人短處造文實有點過份 !

Homan

同意，除左性感身材/外表，佢比其他同期o靚模多左一份大方

hongdonald

Non sense

cityjim

個教授問得衰姐, 問到咁學術化.

wongfai

原帖由 cityjim 於 8-10-2009 17:39 發表 個教授問得衰姐, 問到咁學術化.

 

分明係搵人弱點作出攻擊啦 , 試清醒 D 去諗... 掉番轉頭如果有一個執紙皮執得好叻 , 靠佢黎維生既阿婆 ... 去問教授一 D 關於執紙皮既技巧問題 , 教授係咪一定識呢 ... ? 阿婆一句 : 呢 D 咁基本 , 只要有手有腳既野都唔識 ... 教授當住咁多人面會落到台咩 ?  所以每個人都有自己既優點 , 同缺點 ... , 你唔好理咁多 .. 周小姐攞幾個 POST 就咁多人 BUY , 相反有 D 人係咁自薦做 MODEL 比人影 , 影完 D 相比人睇 , 人地睇完個個響道小 #$%^##.... ; 這個現象叫"眼紅"嗎 ?    另帶出一個題外話 : 政府成日話要環保 , 停車熄匙 , 咩野無煙香港 ... 係呀 ... 表面上好似做到野咁 ... 但 ..... 就 10月1 日國慶煙花果日 , 小弟從銅鑼灣某大廈天台41/F靚景欣賞左 8 分鐘唔夠 , 成個天都係煙 , 火藥味 , 火屎迎面飄埋黎 ...; 令我"叮"一聲諗起 ... 年年係咁放兩次煙花 , 係咪值得呢 ? 真係有人會好期待去睇嗎 ? 一晚煙花響天上既煙 = 幾多個煙民同時響街食煙呢 ? 放果 30 分鐘煙花既錢係咪可以用黎做 D 更有意義既野呢 ... ? 觀點與角度 OR 角度與觀點 ... 我諗沒有對與錯吧 ...

alexphoto

香港的輿論喜歡批評別人的程度已去到"濫批"的地步, 有些人喜歡藉著批評別人去抬高自己, 我只想簡單講一句:如果周秀娜當日能夠與那位教授對答如流,那麼她就不是"o靚模" 而是才女, (但老實說, 她絕對能當一個才女, 起碼比那些出幾本書就被人稱作才女的大方好得多) 如果她能解讀那些問題, 那麼請在埸的大學生通通退學吧, 不要浪費社會資源, 學識是用來幫助自己摃獻社會, 而不是用來欺負知識水平低的人。

michael1611

周秀娜其實好勇敢,明知會比人鬧都去. 而且見佢有準備, 好淡定. 相信其他"o靚模" 未必有膽敢做. 勁