DIY 魚缸沉木（上集）

egg_studio

響金魚街買一舊沉木，動輒一兩百（細 size）至幾舊水（大 size），但大家心知，木頭有幾貴？所以從不同渠道收集幾種 DIY 沉木製作方法，分析咗箇中原理，以屋企做得到（並非工業生產），試做幾舊沉木，價值約五舊（金魚街價）

先從已風乾一年以上嘅樹枝選取心儀形狀；木方面有兩種，分別為下圖嘅銀棯樹及下下圖嘅林柿。（若冇時間風乾，可以用焗爐慢慢焗，不過要有咁大個焗爐……）


銀棯樹枝。（已風乾一年）



林柿樹樹幹。（已風乾三年）



先將樹枝 / 樹幹削皮。（工具：大號「界刀」刀 -- 因銀棯樹樹皮不硬，「界刀」刀已勝任。）



削皮後，露出白色木質。不同樹木有不同顏色；林柿樹木色偏紅，以幾種顏色及紋理組合，應該幾有趣。



呢個樹丫位幾靚，不過削樹皮就辛苦 d。



木色偏紅嘅林柿樹。因為係樹幹關係，樹皮非常厚 + 硬，要用一字頭螺絲批 + 搥仔鑿開樹皮。



搞掂！



圖中，上面果舊係偏紅嘅林柿、下面幼身係白色嘅銀棯。

清洗後，放入水中浸一段時間。因為已去樹皮，只要浸到識沉入水內就 OK。若唔等得，就用水煮。不過，我呢幾舊木最細有半米，冇咁大個煲……所以都係放響水缸慢慢浸。

另外，有一 d  size 細嘅木頭，我將佢地放入廁所水箱（若你屋企用咸水沖廁就唔得），因為廁所水箱 d 水經常「更換」，免省換水嘅步驟。



至於浸到幾時，請留意日後嘅 part 2。

Homan

呢篇文章幾有趣

egg_studio

下集就有，請留意本星期五。

Homan

你個魚缸放得落咩

egg_studio

Homan 發表於 13-1-2014 09:32 AM
你個魚缸放得落咩

放唔落就唔整啦。