急走青衣回歸徑

egg_studio

經常見攝影友響青衣回歸徑影青馬大橋，一路都想去行吓。今日有工作響青衣，中間有兩個鐘 break，所以快上快落，到回歸徑走咗一轉。


因時間關係，響長亨邨搭巴士上長宏邨。巴士總站對面就可見青衣回歸徑指示牌。


見到果牌後，向左沿寮肚路向山走。大約行一分鐘多 d ，就去到回歸徑嘅「北面入口」。


「北面入口」拾級而上，大約走兩、三分鐘，就會見到回歸徑紀念亭。因為今日好多人，所以冇影相。不過個亭建築上冇乜特別。


回歸徑紀念亭向西行約一分鐘，可見青衣北岸公路及船廠。


行多十分鐘，就上到最高點。呢度可飽覽馬灣。不過今日空氣唔清，大嶼山只係隱約可見。


再行前少少，可從另一個角度欣賞青馬大橋。


因時間關係，呢次青衣行山之旅仲趕過歐洲十六國四天遊。匆匆跑落山，搭巴士繼續返工。

egg_studio

alexphoto

當年因工作需要,在青馬橋都未通車時首次上去, 果時未有山徑, 成個山頭都係爛路, 有d位仲要剷草而行, 之後分別於通車當日及97年底上過一次, 條山徑起好後都未上過去, 等天氣清d上去影下相先, 但而家唔知仲可唔可以走到面向青馬橋的山崖邊呢, 如果唔係前景或會被樹木遮擋。

egg_studio

我見有小路通往你所謂嘅山崖,當日趕時間,冇行過去,因為果條路係掘頭,要原路入原路出。