100 年後沙頭角支線（報告）+ 20 個旅遊點
大笪地一向流行『圖多字少 / 冇』，但沙頭角支線遺蹟唔係三言兩語講得完，所以有興趣及心機睇長篇大論就請睇我網站的完整版《100 年後沙頭角支線，仲有遺蹟搵得到？》lA67Y_n47j4
其實做沙頭角支線研究係出於幾年前「深山大鐵板」呢單嘢，響馬鞍山高山上挖出一截路軌，考究後應該屬 1928 年停運的沙頭角支線（又要重申：路軌地點是「馬鞍山高山」，不是「馬鞍山礦場」）。之後陸續響香港不同地點搵到沙頭角支線的路軌，結果寫成《九廣鐵路舊路軌的故事》。最後，做埋沙頭角支線走線及遺蹟，咁三部曲就大致完成。
長篇大論就留番去 egg studio 網站睇，我響呢度簡單總結有幾多遺蹟可搵到（及搵唔到）：
從粉嶺站順序列出：
1) 粉嶺站 — 80 年代改建為現今的電氣化車站，旁邊原本的沙頭角支線響我細個時（70 年代）就已經改建為站房及停車場，總之一句講曬：乜都冇；
2) 龍躍頭站 — 發展咗聯和墟及工業村，都係乜都冇；
3) 孔嶺站 — 三級歷史建築，有機會經過可以睇睇；
4) 粉嶺站至禾坑路軌及路基 — 路軌拆走變賣，路基成為沙頭角公路（以前是單線，鐵路停運後逐漸擴闊）
4) 禾坑站 — 拆曬，部分變成村屋及樹林，但懷疑畀蒸汽火車加水用嘅水塔仲係度；
5) 禾坑涵洞 A 及 B — A 現在響村民屋企範圍； B 響農地旁；
6) 禾坑橋 — 仲有一邊橋躉，是至今保存最好的橋梁遺蹟；
7) 大朗橋（懷疑）— egg studio 原文冇寫，因為當時冇人問……大朗橋的磚比禾坑橋及麻雀嶺橋細，所以有機會唔關沙頭角支線事；
8) 大朗至麻雀嶺之間的橋 — 現場搵過，冇發現，應該拆曬乜都冇；
9) 麻雀嶺橋 — 睇 video 就知，響河床挖番出嚟！
10) 禾坑至石橋頭路基 — 大致完整，睇得好清楚；
11) 石橋頭至立和路基 — 冇路入，未探索；
12) 立和橋 — 冇路入，未探索；
13) 立和路基 — 發展曬，乜都冇；
14) 石涌凹路基 — 完整，部分變了水泥村路；
15) 石涌凹站 — 剩番地基，但確實位置因為搵唔到當時人親口確認，所以暫列「懷疑」（請看 egg studio 原文）
16) 沙頭角農莊 — 最完整路基，仲有資料館；
17) 塘肚橋 — 因河道治理工程，已拆毀；
18) 塘肚路基 — 埋於地底（靠大笪地透地雷達睇到）；
19) 塘肚至沙頭角路基 — 變曬公路、村屋、沙頭角邨，乜都冇；
20) 沙頭角站 — 變曬馬路及沙頭角邨，乜都冇；
所以，仲有 (11) 及 (12)，留番秋天玩！
多謝，稍後仲會有《香港舊路軌的故事》（非九廣鐵路）及第一代電氣化火車「黃頭櫈」修復，敬請留意~ huge respect to your commitment in searching for these historical artifacts! 支持呀! 你真係花好多心機同功夫.....有心人~:) 都唔算得好辛苦，因為都係每次練單車練車經過時探一探及拍片，唔係一次過搞㗎 都係嗰句，出心出力，謝謝分享。
估唔到沙頭角線仲有咁多值得探索嘅好嘢。 同意仲有好多嘢，包括（11）及（12）。而我有反思過點解好多人以為冇遺蹟，其實係網上太多失實資料，來自你抄我、我抄你，冇人會去確認究竟真定假，最緊要抄得快。 所以必須親力親為，咁先夠有趣。 Very detail and thx for sharing! very interesting
長知識了，謝謝！
感謝付出,支持
頁:
[1]