第二及第三階段解禁禁區 -- 一鑊過遊

egg_studio

呢排好多會員踴躍分享第三階段禁區開放單車遊，所以日前嚟次單車遊，穿梭第二及第三階段解禁禁區，即係落馬洲（第二階段）及打鼓嶺一帶（第三階段）。

部分地方響本版已介紹過好多次，所以不重覆出相，有興趣 / 唔知嘅請按 link 或自行搜尋關鍵詞。

路線：上水 -- 恐龍坑下路（唔上 XC 場）-- 打鼓嶺警署（探警察朋友）-- 松園下 -- XC 拜山路 -- 打鼓嶺 -- 坪洋 -- 塘肚古道入口 -- 坪輋 -- 老鼠嶺 -- 嶺英學校 -- 文錦渡 -- 大水管 -- 大石磨 -- 新大石磨 -- 落馬洲魚塘路 -- 馬草壟 --  馬草壟堆填區 -- 新田軍營（不入軍營，另走獨木鐵橋） -- 牛潭尾軍營 -- 錦田

恐龍坑就唔講，請睇番上次 post（兩入兩出解禁禁區 -- 文錦渡、白虎山碉堡、坪洋 XC）。所謂「下路」，即係唔上恐龍坑山頂，取另一條路入蓮麻坑，一樣可以 skip 咗日頭好多車嘅文錦渡路。


咁去打鼓嶺警署探完邊境警員後，去到某間大宅（注意，不是荒廢的，切勿亂闖） -- 經本版會員介紹，原來識人的話，可以參觀入面嘅日治遺痕，認真有意思！（另看：禁區開放(二) - 日治遺痕）


之後去附近天后廟及祠堂拜一拜，保祐大家新一年單車出入平安！






之後經 XC 路往坪洋，順便踩上景點「噹噹石」-- 當地傳說，若你敲唔響「噹噹石」，來年行衰運，所以有心理準確先好敲，否則一個唔好彩，衰一年。


「噹噹石」上一覽坪洋全景。


之後冇乜好影，直至去到老鼠嶺嘅嶺英公立學校 -- 以果一帶村校，嶺英及另一間不但冇殺校，仲越做越大，所以，做教育，一樣要俾個心出嚟，否則好似某啲被殺嘅學校，只顧怨政府……（我自己係教育行政界，近年見好多「政治化」嘅事件，不止 TSA，總之贏家就係某啲叛中亂港嘅政黨及其背後國家/省份，輸家就係大家……）


講番單車 -- 嶺英公立學校山後一條鬼影都冇嘅路，可以通去蓮麻坑路，又可以避咗馬路了！


經大水管後，爬坡上大石磨。


參觀英軍瞭望台。


從英軍瞭望台瞭望落馬洲魚塘及深圳。


之後沿新大石磨路下山（此路尚未完成，有一段要抬車）-- 版主親自示範正宗落山姿勢。


之後經馬草壟堆填區往錦田。

另外，提到去到新田軍營前，大部分人會經軍營往牛潭尾，但另有一條好窄嘅隱蔽村路，當中有一條十幾米長、半米闊嘅鐵橋，冇欄，跌落去就 xx 了。因為太危險，所以冇停車影相，稍後補番，敬請留意。

egg_studio

補番獨木鐵橋相。

5542

正喎

「噹噹石」應該就係我十幾年前去過果舊了...