測試：Continental X-King 29 ProTection tires

egg_studio

個多月前，經人推薦，買咗幾對 Continental X-King 29 ProTection 車呔，響唔同地形試咗個多月，出吓報告，大家分享分享。

平時好少出單車損耗品報告，一來話明「損耗」，你睇得嚟都夠鐘買過；二來，人總是花心，當 A 產品「損耗」，就會買 B 產品，除非 A 產品非常好用！

不過，有一啲產品，真係有問題，要出出報告，提醒大家小心小心。

入正題：

從 26" MTB 年代起，用過不同牌子車呔，最終用最大路嘅 Crossmark。一來平、二來真係穩陣 -- 有車友講過一句：Crossmark 咁多年都冇轉款又冇新款（更加冇停產），好明顯係好嘢！呢句話我十分認同 -- 從 26"，至依家嘅第二架 29ER 單車，我都係用 Crossmark。

不過，前排經人推薦，加上 XX 痕，又見做緊特價，就以二百蚊尾嘅價錢（一條）買咗幾對，分別由我及另外三位 FF Cup 攞獎車手測試。

裝呔
裝車呔時，一攞上手，同用開嘅 Crossmark UST 比較，重量輕好多：

Crossmark UST : 840g（官方資料）
X-King：655g（官方資料）

即係，裝一對就輕咗 380g！

老實講，雖然每間廠都話有乜乜「秘方」，實際上大家都係橡膠，咁 380g 輕咗響邊呢？X-King 呔上釘紋明顯少，而且 sidewall 薄好多。正正 sidewall 薄嘅關係，引致以下一連串問題：

裝呔時，因為 sidewall 太薄，根本 mount 唔到上車框。我平時裝 UST 呔，大約 10 分鐘搞掂，一般都唔駛出到番梘水（我用嘅係 Mavic 819 UST rim）。呢對 X-King，因為 sidewall 太薄，條呔「企」唔起，番梘水都冇幫助，出埋大笪地領導人嘅電 pump 都 pump 唔起。唯有上網搵資料，發現有不少人有相同問題。

解決方法係先裝內呔，用內呔「迫」起 X-King，之後攞番內呔出嚟，先成功裝到。

Sealant ??
至於 sealant，暫時唔落住，因為：

好奇怪，佢應該係 Tubeless Ready 嘅呔，不過從呔上面，甚至官網，都冇好明確咁話係 Tubeless Ready（官網只係用 "Revolution Tubeless Ready" 去形容），更加唔係 UST 呔。

據內行人反映，可能係唔想俾 license 錢（德國要養起成個歐盟，冇辦法……）……不過，網上有人試過，當 UST 咁用（即係唔加 sealant），同樣冇問題。

咁為咗解開呢個謎，我以身試險，就唔用 sealant ，打 50psi，睇吓幾耐會冇氣。

結果，踩咗四轉大帽山越野單車徑，都冇漏氣。

咁之後為防止爆呔，都加番 sealant。加嘅方法係放氣後，響 sidewall 㩒個窿仔，然後用針筒打入去。結果，惡夢又嚟，就係 sidewall 又「企」唔番……不過今次好啲，用番梘水及電 pump 就搞掂。

測試
之後一個月，大約踩咗 500 公里左右，主要係大帽山河背越野單車徑（碎石、樹根）、田夫仔林道（石屎路）、環塘（一半泥路、一半石屎），及返工放工嘅馬路；另外去咗梁化（碎石）及入礦洞踩（大碎石）。除泥漿及沙地外，常見地形都試過。

氣壓方面，以 29ER 硬架，從 50psi（參考官網）逐漸試到 15psi，發現 X-King 對呔壓嘅寬容度好低，例如，高過 30psi，響香港嘅 XC 路已極度跳動（我 145lb，單車 21lb）；若低過 30psi，吸震會好好，不過，又係因為 sidewall 過薄，一轉彎，車呔會「沉一沉」，頗難控制。相比之下，Crossmark UST 就算響 10psi ，都未試過有呢個情況。

其中一位車手，大約踩咗兩星期，sidewall 就俾石「界」爆，成條呔「湯」開。

至於我，一個月內，前後呔各爆一次。用 Crossmark 三年，只係因為「杉」釘爆過一次。

咬地方面，響 30psi 下，環塘嘅路況裏，石頭及上斜泥坡尾轆咬唔到地；相對平坦嘅河背越野單車徑就 OK；響天門（新元朗仔）同樣不咬地；石屎路噪音大；整體差過 Crossmark。

響 15-20psi 下，梁化碎石下坡路非常咬地，但轉彎會沉。30psi 以上就彈到踩唔到，除非自己增肥。

總結
換呔原因，除咗 xx 痕外，其實為咗響個多月後嘅 XC 多日賽裏，搵一條專攻沙泥碎石路嘅呔。相比之下，Crossmark 對所有地形都好，但不是最好，而且重量重。

自己測試完後，又參考外國網站嘅 review，原來答案都係差不多。

不過，測試過後，X-King 好明顯係捱唔到 XC 比賽，只適合平日玩吓鄉郊路、唔會「禽」石，及對於呔壓唔講究嘅車手。