華山軍路行山遊（多圖）

egg_studio

秋高氣爽，又係行山好日子。

今天輕鬆一走新界東北華山，從上水沿華山軍路往坪輋。華山軍路全程 5 公里，體力要求不高，早上有不少當地人晨運及練單車；山下有解放軍靶場 -- 上面行山、下面打靶，軍民一樂也。


華山軍路入口響文錦渡及虎地坳附近，冇街名，所以好多人都搵唔到，唯有看圖認路。


認吓右邊個招牌。


行幾百米後，路一開二。左邊係華山軍路，右邊係華山下路。

華山下路可通往另一隱世勝景「虛白祖山界」（另看：夜遊華山探秘 -- 「虛白祖山界」）


之後軍路一條，冇分叉，正常唔會蕩失。


向北望，山下係冷門單車練車路線恐龍坑，遠少少係將於 2016 年年頭開放嘅禁區。（另看：第三階段禁區開放 -- 單車路線前瞻及介紹）


另一邊，遠處高樓大廈就係上水。近處係華山村，及響好耐之前網台節目介紹過嘅風水地「烏鴉落陽」。


越野單車手應該認識嘅天平山，正身係大嶺練靶場。


今日有打靶，所以紅旗高揚！


行到軍路最斜之處，發現一輛 Collora，響不自量力情況下，勇闖軍路，結果唔夠力上山，又冇位調頭，動彈不得。


早兩三年響香港某個「七分假、兩分作大、一分真」嘅討論區上，曾經興起揸車上華山，令不少人信以為真，以為一般日本車仔可以上到軍路（但人地係揸 4x4）。結果係，當時不少私家車被困山上，而拖車入唔到，入到果啲收幾倍價，而且第三保唔 cover。今日所見，該車兩側被野草及樹枝刮花，倒後鏡撞爛 -- 幾年過後，仍有人上山做傻事。


軍路末段，山頭上有一軍徽。今次行過，又見軍徽被重新上色。相對古洞北軍徽，一年只能「出現兩次」，同為殖民年代軍徽，下場如此不同？（另看：古洞北蘇格蘭兵軍徽 -- 航空圖及實地考察）


軍徽地勢陡斜，又冇相機，只能以電話「盡影」。


另一邊可見通往老鼠嶺馬路。（另看：第三階段禁區開放 -- 單車路線前瞻及介紹）


再落少少，隱約見到北區隱世勝景（但經網台介紹後，已十分著名）-- 山雞湖。不過，今日並非打風過後，所以未有鏡面出現。

另看：
北區隱世勝景 — 山雞湖 + 上水華山軍路
及
大笪地山雞湖相關內容


最後穿過鐵閘，完成華山軍路。

5542

細個行過, 印象中沿途有頗多石英礦
記得當時係串遊禾徑山路一個小山崗上的「咚咚石」

egg_studio

點冬冬法？

5542

所謂咚咚石係一舊水平大石, 拎舊石扑落去是敲得響的
我諗有點類似海下東風石

不過年代較久遠(十幾年前), 只記得係五洲路以北、禾徑山路西面的一個小山崗

ChanLing@FB

個軍徽好特別，難唔難搵??

egg_studio

ChanLing@FB 發表於 15-11-2015 09:57 PM
個軍徽好特別，難唔難搵??

呢個唔難。從上水往坪輋，若唔好一路行一路玩電話就會睇到。

5542

唔知有無睇錯, 早幾日搭車經過沙頭角公路都見到

egg_studio

冇睇錯，響沙頭角公路會見到，特別係之前又油過顏色。（亦表示你搭車時冇做低頭族~）