北海道公幹遊（多圖）

egg_studio

前排到北海道公幹，因為租車關係，可以隨時停車，不過可以趁空檔去嘅地方不多，亦冇乜對景點先做事前 research，只能稍作分享。

今次由札幌入，經過登別、室蘭、富良野、旭川，最後札幌走。


一到札幌，就去魚市場食海鮮。日本海鮮基本上不及香港啲日式料理咁多花款，因為據 Discovery Channels 、響香港做入口批發嘅朋友所講、及以前響「日本殖民地」生活好多年嘅經驗得知，日本海入面捕獲嘅魚種不多，大部分所謂「日本漁獲」都係響東南亞捕獲，真正響日本沿岸捉到嘅海鮮嚟嚟去去都係魚市場有得賣果幾種，包括日本好平、香港好貴嘅吞拿魚拖羅。


室蘭有一處響日本國內被選為「北海道 100 自然勝景」第一位嘅地球岬。一般香港旅行團不會去，而北海道早上 3am 就天光，於是四點從登別揸車快走，開工前返到登別。


但係，如果呢度係 No.1，其他 99 個應該唔駛去，也難怪香港旅行團不去。


地球岬的幸福之鐘。


有兩日住登別溫泉酒店。呢度係日本少有嘅「真溫泉」（據日本溫泉協會早年指出，日本有七成溫泉都係用熱水開 + 溫泉素，詳細請自行上網搵資料或睇番幾年前日本假溫泉嘅新聞 -- 要浸真溫泉，返國內好過啦 <-- 繼續睇下文就知）

亦因為「八卦」一下呢個係真定假，於是沿酒店取水嘅水喉走，去到泉眼。若水喉係真的話，咁呢度係 30% 之一。




除上圖泉眼外，附近有幾個泉眼，溫泉水沿河下流，有一處地方供人「泡足」。


原本係火山口嘅俱多樂湖，因為遊客不多，連租鴨仔船及湖畔餐廳都休息 -- 一個人都冇。


試一間當地頗出名（但都好 x 貴）嘅咖喱屋。


鹿肉咖喱飯 + 腸仔。


好多人會去富良野睇花，但當地花田只能勉強遠觀，不能近看（比國內的巨型花田相比，簡直……）不過，沿途農田及野生嘅花比花田仲靚，值得一看。


未開嘅薰衣草。


開緊嘅薰衣草。（路邊，不是旅遊書及觀光協會介紹的花田）




旅遊景點 -- 青い池。


旭川動物園：一個幾特別嘅海獅館 -- 睇完仲去超市買海獅肉食。


響乜乜農場度整芝士，即席揮毫畫封面。


路經一間神舍，入去行個圈。


路經一個小鎮嘅平價鞋鋪，入面賣嘅竟然係響羅湖商業城及珠海絕跡多年嘅 A / B 貨假 Nike 及 New Balance 波鞋。


路經國道，突然有尾狐狸撲出馬路。


狐狸之後，路經 Rx7 墳場。




又講吓飲飲食食。北海道有幾款本土啤酒，個人認為比乜乜 angel ring 好飲好多。


鹿肉、海獅肉食過，食埋馬肉（刺身）。


香港人發了瘋的日本威士忌響機場炒到好貴（據悉香港有酒鋪會高價收）。自己飲過，只屬一般之下料子，若相比蘇格蘭威士忌，應該只值百多元（個人主觀意見，日本威士忌 fans 請勿介意）。圖中冇影到 12 年款，超市賣 6000 日圓。


反而北海道本土出品，比上面果隻平又好飲啲（結果最後買咗支 5000 日圓 12 年某北海道出品）。響居酒屋有 2000 日圓兩小時任飲，可以試齊 60 幾款清酒、燒酒、威士忌、啤酒，之後買乜嘢酒都清晰晒。


路經一間家庭式釀酒廠，試咗佢話最苦最「辛」果支生啤，即場響酒缸入樽。


之後食鯨魚。


食完去超市買罐罐頭。（其後仲有熊肉）


響札幌，有間啤酒廠改建成餐廳及商場。


因為飲得多，早餐就食清啲。幾日早餐都係豆腐一磚 + 咖啡或茶。


不過最後一天，早餐改為拖羅 + 綠茶。


酒店早餐的「霸枱牌」，三種語言，各自發揮。若國內遊客按照牌上所述「回家時先還番個牌」，又會被蘋果日報借題發揮 / 作新聞，話國內旅客偷嘢。（英語旅客應該唔明要做乜）


旅程中浸過三個溫泉：登別、富良野及旭川。上圖是旭川某溫泉，屬「真溫泉」 -- 據日本旅遊達人兼大笪地版主所講，佢去日本一定不浸溫泉，因為廢事浸假。而從 Discovery Channels 及其他日本達人教路，水質及氣味不能作真（因為有溫泉素），分辨真假要睇有冇證書；若有，留意上面嘅「出水量」。


當然，先要假設張證書係真。

咁假溫泉？響富良野就中過伏！一來冇證書、二來只有氯氣味，加上熱水，浸完成身氯氣。（酒店名：有人問先開名）

egg_studio

更多照片請看 egg studio 網站。

EsnaChu@FB

正, 我仲未有機會去北海道, 看圖過住隱先

wwwwy

日本話有核輻射洩漏後香港好多日本餐都話其實來貨多數都係大陸同東南亞，都係餐廳嘅策略姐，小弟做緊嘅飲食業都係咁，掛住德法日係好聽D嘛。
而TORO呢其實係大黑（魚有）嘅OTORO先貴（仲要日本捕，唔係其他地方捕），yellowfin, bigeye就無咁貴，又係果句我做緊part time嘅餐廳都係咁呃鬼佬。
北海道魚獲係唔夠駿河灣一帶多，識D日文的話去D小店係有好多唔同嘅catch of the day揀，仲要係要問"地元"捕嘅，就會食到D古怪魚，同埋乜鬼嘢都會攞嚟生食，但好多時我地香港用嚟餵貓嘅魚佢地反而係高級魚，識去呢D店之後就會發覺築地D嘢係麻麻地。
日本仔其實主要都係食呢三種魚:aji , saba , katsuo, 呢三種都係平價魚，D小店有時會用呢D魚攪好多花臣，又平又好味。

鯨魚肉你要試深紅色嗰PART嘅肉，無論生同熟都好X難食（個人口味），食生馬肉就要試埋馬血管，唔錯嘅。

Homan

生馬肉應該啱樓主
嘩，我唔識咁多種魚
但見到你舊Toro 真係流口水

egg_studio

冇錯，鯨魚及海獅肉都唔好食。

神秘人

5通系帶遊學團?