|
|
登記成為會員，看更多精采內容！
您需要 登錄 才可以下載或查看，沒有賬號？登記成會員
×
今次應該係 Action Asia 響香港本土第一次搞長距離越野比賽。晨咁早七點響山頂開始，相比同樣以港島徑嘅環島行，參賽者及規模人當然細，不過冇咗我最討厭果位環島行港女大會司儀果把死人聲，讓比賽可以響熱鬧但不喧嘩嘅情形下開始。
頭 25 km 沿港島徑行，所以用番之前環島行嘅策略，約三小時半輕鬆完成頭 25km，抵達黃泥涌峽 checkpoint。（不過大會 set 咗五小時為 cutoff，所以比賽水平比環島行高好多。）
之後轉入金督馳馬徑，一路向山下馳。差唔多馳到山腳時，見到大會專用攝影師。寒喧數句後，沿畢拉山道上山，去到石礦場時轉入山路。彎彎曲曲，轉成個鐘頭，中間有個大會工作鬼佬，話仲行多四公里就到 checkpoint。繼續轉、繼續彎曲，左面景色仍然係港島全景，好似港島徑第七段一樣，紅灣又紅灣咁，不過仲攞命，因為係上斜。Checkpoint 小休後（原來頭 30 km 冇停過），出番柏架山道，沿馬路上去大風坳。
終於上到大風坳。之前行港島徑，一上一落畢拉山最多九個字，但行呢條路就花咗成兩個鐘。港島徑就響大風坳呢度直衝落大潭水塘，只需十分鐘，而今次就沿野豬徑，結果轉咗成個鐘先去到大潭水塘。之後轉入水務文物徑，一路慢jog一路欣賞水務文物，呢度確實係風景優美、適合一家大細及半夜偷情嘅好去處。
最後一個 checkpoint 響水務文物徑末端，之後需要原路折返。開頭見到不少參賽者折返，心情被打擊，之後當自己折返時，數下數下，約長 1.5km 嘅路上迎面遇到 18 人，咁肯定知道至少有 18 人響我後面，未計仲響野豬徑轉緊果 d，心情又回復咗少少。
最後約 8 km 路，響大潭中水塘旁邊向上行，經淺水灣坳再上紫羅蘭山。好彩唔駛上到紫羅蘭山頂。響山中間轉入約 5km 引水道，引水道當然又係「轉埋果彎就到」果隻，轉咗 5km ，安全返到終點。
以 GPS 資料顯示，total climb 1551m -- 因為下半截嘅 25km 未行過，因此初頭有個誤解，就係以為港島徑係落山，不過原來下半截嘅 25km 係不斷上上落落。
上年環島行用咗七個半鐘，而今次約八個半鐘，以 Action Asia 的難度，成績雖不太好，但收貨~~~
|
|
發表於 30-10-2011 19:44:31
