蓮麻坑、打鼓嶺、文錦渡禁區開放--現場報導（多圖）
第三階段禁區開放（正名：第三階段縮減邊境禁區範圍）響幾小時前落實，因為住得近又識相關人士，知道有另類「開放儀式」，所以專登去睇睇。另看：第三階段禁區開放 -- 單車路線前瞻及介紹
幾年前，第一階段開放時都有參加當地人 11:59pm 盤菜宴及「衝閘儀式」，不過今次第三階就非常低調，只有政府新聞稿發放（各大報章都只係轉載新聞稿。），可能係咁，當大約 11:40pm 踩單車去文錦渡檢查站，去到時只見一兩個疑似記者影相。至於「閒人」，只有我及一位某大學歷史系「行家」，幾個人響閘前等睇「開放儀式」。
第三階段禁區開放會有兩個閘口開放，包括文錦渡及坪輋。我選擇到文錦渡，因為面積大好多，而坪輋果邊就冇乜嘢好睇。
大約 11:40pm 踩單車去文錦渡。
去到時，貨櫃車通道已經封咗，有一班路標工程人員企曬響度 stand by。
而我就泊好單車 -- 換轉平日，咁樣泊單車一定連人帶車被人抬走 + 上庭。
等夠鐘期間，同警員吹吓水，問清楚禁區解禁範圍，特別係平日「偷入」果幾條村路，依家係咪真係開放咗㗎？
12am 夠鐘。警員好快手咁搬走曬路障、警告牌等等。
警車封路，乜唔係開放嗎？原來……（看下圖）
同時，stand by 嘅工程人員立刻用新鮮熱辣嘅瀝青將地上嘅「STOP」sign 填走。
填走「STOP」sign後，連中間條行車線都填走。
相中間 T 字牌原本係禁區警告牌，工程人員好快咁油白佢。
閘嘅另一邊，都係將「STOP」sign 填走。
十幾分鐘後，路障、路牌、行車線、Stop sign 清曬，警員及工程人員快速撤退，檢查站熄燈，完成歷史任務。
之後，就好似平時咁入去（依家禁區開放，所以唔駛「閱讀權限」了……）。相中係文錦渡路 -- 大家若記得，幾年前大笪地活動「新年飛bike行大運報告：華山-恐龍坑-邊境-長瀝-粉嶺」就係響呢條路回程。
之後係現在嘅禁區 -- 文錦渡管制站。呢度同沙頭角管制站一樣，一定要搭車入，換言之，若過關返大陸，唔可以搭的士閘口落、唔可以踩單車過關、行過去更加唔得，一定要搭過境巴士。
呢度就係當年大笪地「邊境揮手團」嘅景點 -- 「揮手區」。未參加過嘅，應該唔知點解叫 「揮手區」？因為呢個位置同深圳最近，十幾米外就係深圳，可以向響對面等巴士嘅深圳居民揮手及傾計。
呢張相唔清楚；第日日頭先再影過 -- 相中路口就係過去「偷入禁區」嘅主要路線老鼠嶺。以前，出入禁區的練單車路線，一般係由上恐龍坑，走村路落蓮麻坑路，然後老鼠嶺出坪輋，依家呢條路已「合法」了。
呢條係巡邏路，禁區開放咗都唔入得，所以有警員將佢拉閘。
亦因為呢條巡邏路及一啲歷史關係（應該由探險版版主講，因為佢有第一手資料），禁區開放後，前面嘅蓮麻坑路仍屬禁區，不可用蓮麻坑路進出蓮麻坑村。當然，有第二條路，請睇香港越野單車路線一覽表（非官方，但合法路線）。
之後轉出坪輋。坪輋閘口比較簡陋，冇乜嘢好睇。
此外，坪輋閘口左右都係民居，為免騷擾村民，睇「儀式」都係去番文錦渡果邊。
不過，講開又講，以前好多人問點入禁區。其實，響坪輋閘口前一百米有村路，可繞過檢查站，入到去就可到達打鼓嶺村。（當年，沙頭角禁區一樣有一條「閘口旁邊的小路」，方便冇禁區紙嘅當地人出入……）
禁區開放報導到此完畢，大家以後多咗練單車好地方！不過謹記，唔好嘈生曬騷擾當地人，及記得幫趁 local 士多買汽水。
配合禁區開放，香港越野單車路線一覽表（非官方，但合法路線）又 update 了，大家多多支持。
http://www.photomarket.hk/data/attachment/forum/201511/01/213834az0iwwuiyiuuwnzq.png
v informative thank you
謝謝師兄! 好詳盡正到飛起
好奇問下: 羅湖道>羅湖車站 A1 及A2 出口 是否依然是禁區?
心癮起想羅架車過深圳綠道踩下...
大家都知落馬洲太多水客上唔到的士...:L
hnixonk 發表於 20-1-2016 12:23 AM
好詳盡正到飛起
好奇問下: 羅湖道>羅湖車站 A1 及A2 出口 是否依然是禁區?
唔可以 -- 所有口岸，包括羅湖、落馬洲、文錦渡、沙頭角……都必須使用交通工具進出，所以，除非你有禁區紙，例如羅湖村、沙頭角村（中英街或沙頭角公屋），你唔可以用人腳或單車直入口岸過關。
egg_studio 發表於 20-1-2016 11:21 AM
唔可以 -- 所有口岸，包括羅湖、落馬洲、文錦渡、沙頭角……都必須使用交通工具進出，所以，除非你有禁區 ...
謝謝egg兄指點 :)
只來到呢度 LamLeungWan@FB 發表於 21-1-2016 11:45 AM
只來到呢度
有乜睇？快啲介紹吓！
我過幾日等好天都會去踩單車。
本來諗住羅湖路可以入羅湖村,點知入村一定要經呢個閘...即系吾洗入,諗住閘邊小路有得繼續推進,點之下面系臭河無路,沿路左邊安睡地,所以吾闖......
今晚收工得閒響呢個單車版出篇遊記先 不過....真系要入村無話吾得既...哈哈 有朋友在上山下海 post 過以下：
「行157東脊落到山腳，發現有條橫山徑，所以回程要試試。姑且稱之「157走廊」。 」
「157走廊」無須上山就可以接通白虎山和蓮麻坑，只要稍加修理，將來一定好hit !
請問eggstudio 兄踩過此段未？
原文
呢條所謂 "157" 我一早就知，我地叫「拜山路」，入口係響警崗隔離，而警員會話你知唔通，原因係當地村民反對外人行，所以警崗警員「識做」……你踩單車入就一定會俾人截。
頁:
[1]