RIDEA 防水 BB 開箱及測試
BB 係越野單車入面「最快要換嘅損耗品」 -- 過去用過 SRAM 原裝鋼珠 BB 及另一隻二線牌子陶瓷 BB，經過兩三次水戰後，BB 入水入沙，就算勤清理及加油，兩三個月後打柴，所以搵吓有冇防水性高嘅 BB。市面上可以買到嘅防水 BB 得一兩隻，反正係「損耗品」，就買平價嘅 RIDEA。過去我有不少「G、E、M」台灣牌子不快經驗（請自行爬舊 posts），深信不止食物，單車界 Made in Taiwan 九成係垃圾，好彩睇過官網介紹，RIDEA 係台資大陸廠，即係 Made in China，於是買一隻試試！（可能有啲人會不同意，但我幾十年單車經驗，單車嘢唔理高中低價，唔會有嘢衰得過 Made in Taiwan）
因為用響越野車關係，選擇鋼珠，不揀陶瓷。佢防水嘅「奧秘」係，啤令及 housing 之間有膠墊圈，裏面有彈弓頂住，防沙防水。
響新界某越野單車場冒大雨快走七圈，全部沙石路 + 水窪，一如正常，BB、鍊餅、鍊全部係沙 + 水，之後拆開鍊餅，只有 BB 外圍有沙，裏面冇入水及沙。
暢順度方面，用手指轉動時，冇陶瓷果種順滑，但有鋼珠及珠盤果種壓力感覺，而安裝鍊餅後唔會有分別。
至於防水嘅墊圈可以捱幾耐？就要等時間去測試。有機會再出報告。
咁如我地少浸水上山落山的，一般幾耐要check下個BB 其實你問 10 個人，應該有 10 個不同答案。
有啲人認為，BB 係損耗品，所以唔加油唔清理，淨係踩完洗車，最後等到 BB 有聲或者轉得唔順就換，因為一般 SRAM 及 Shimano 嘅 BB 都係百零蚊，若買台灣二三線果啲就一百有找，而且拆 BB 又要特別工具，拆完洗完又要上油，樽油又成舊水……所以佢地費事搞咁多嘢。
我就「大水戰」後會拆出嚟清潔及加油，冇話幾耐一次，都係睇有冇浸過水。 咁平時洗車時搵水沖有冇影響?
我平時都係搵水沖，只要得閑就拆出嚟清潔及加油。
頁:
[1]