汕尾單車之旅
收音機經常聽到：天氣預報......南澳以南、汕尾以南，風力達幾多幾多級......近年香港不少單車手組團往大陸踩單車，而南澳一帶已經成為港深兩地熱門路線。今次途中區區沙頭角至葵涌鎮一個多小時車程，已經有五、六隊國內及香港車手來回南澳。不過今次踩得遠 d -- 往汕尾進發！
出發前已擬定路線，大致以國道及鄉道為主，同時探吓 shortcut，一來希望搵到短 d 嘅路線，二來搵 d 好玩嘅 XC 路段。
擬定路線請參考：[活動召集] 汕尾單車團 -- 兩日一夜
http://www.photomarket.hk/forum.php?mod=viewthread&tid=4087&extra=page%3D1
最後行經路線：
Day 1：沙頭角 -- 葵涌鎮 -- 澳頭 -- 曾屋寮 -- 稔山
Day 2：稔山 -- 吉隆 -- 圓墩 -- 后門 -- 梅隆 -- 汕尾
此路線包括好玩嘅村路、XC 路、鍛練（消磨）意志嘅地獄路、國道等，值得推薦。不過因每天需踩超過一百公里，並非全公路，需一定體能及技術。此外，部分路線，特別係 shortcut 、XC 等路段，響最初參考之省交通圖、Google 地圖、百度地圖等都冇顯示，建議不諳探路者跟本 forum 官方單車團。
路線簡述：
沙頭角至葵涌鎮一段，即係熱門之南澳路線。基本上跟住綠道行，沿途會有好多港深車手，口在路邊，虛心詢問，應該不會迷路。
沙頭角約半小時車程，抵達小梅沙。
葵涌鎮後，需攀山到達海邊，繼續沿綠道，最後進入沿海 XC 路，遊覽珍珠養值場。XC 路末，就係澳頭。
上次正值農曆新年經過澳頭，小城裏冇乜人。今次再到，一樣冇乜人，不過見海邊起緊高樓，心諗，邊有咁多人住？
響澳頭食過餃子當中午飯後，沿石化大道向東行。呢條石化大道可謂地獄之路。
石化大道係一個巨型煉油廠中央約長十五公里一條畢直嘅馬路。地圖顯示係一條畢直嘅線，眼前前路茫茫，當日氣溫達 40 度以上，大道上冇遮冇掩，正值中午時份，唔好話樹蔭，連搵個影遮吓太陽都冇。
呢條地獄之路去到約十公里後有一個油站，立刻入去抖抖買嘢飲涼冷氣。
之後繼續餘下五公里直路，駁上鄉道至鹽灶背（我響地圖睇番先知果度叫鹽灶背，怪不得當日響士多問路時人地答咗我地都聽唔明）。鹽灶背至 871 鄉道乃好玩之 XC 路。
沿擬定路線，響曾屋寮一帶搵到一條好唔起眼嘅小路，通到對岸嘅稔山。第一晚就響稔山過夜。
第二日從稔山向東南沿 324 國道往吉隆。稔山係一個小鎮，而吉隆就係一個大少少嘅小鎮。兩個鎮都冇乜特別，所以匆匆而過。
吉隆鎮
因早前擬定路線中，有一條可慳三十公里之「超級 shortcut」，所以到達后門後，就趁休息響油站問人。咁啱油站姐姐響汕尾住，每日揸摩托沿我擬定果條「超級 shortcut」返工，佢簡單指示點樣搵到 shortcut 入口後，我地心情大快，結果響擬定嘅南山油站搵到 shortcut 入口。
南山油站前之沿海國道
「超級 shortcut」開頭與興建中之廈深高鐵平行，心諗明年高鐵通車後，可擬土樓之旅。
不過雖然慳咗三十公里，但「超級 shortcut」其實都係一條直畢甩、長十公里嘅地獄之路。
「超級 shortcut」終點。右轉就係汕尾。
到最後一個關鍵位，就係「超級 shortcut」需要響禁止摩托（禁止摩托，但單車及行人冇問題）嘅跨海大橋（沈海高速）偷雞過河。
過河後，一條短短嘅 XC 下山路，駁上國道，踩多十公里後抵達汕尾，完成探路之旅。
Full album at http://photo.eggstudio.com/index.php/egg/bike2011-8
頁:
[1]