三餐牛肉 (上) 之 王廚咖啡--少油少鹽少糖未食已經小小聲

egg_studio

今日早午晚三餐都係食牛，而其中午晚兩餐都要介紹吓，所以分上下兩 post，以免讀者搞錯兩間食肆。

之於早餐都係普通茶餐廳嘅沙爹牛肉麵 + 餐飲凍奶茶，冇乜特別，可以不提。

上集講午餐。

午餐響沙田圍頭村王廚咖啡，因為兩點後先光臨，所以午餐已經收起，局住 order 正價餐牌粉麵飯。

Order 咗豉椒牛肉炒麵。



未食之前，介紹吓呢間茶餐廳 -- 呢間茶餐廳標榜少油少鹽不加味精，加上 sign up 咗果 d 乜乜有營食肆，做到個樣好健康。不過，個人對味精好開放，而自己都讀過吓書，知道味精本身對人體係有益的物質，放響食物入面嘅好與壞同廚師及用料有關，反而味精本身無罪。因此，我唔會因為有餐廳標榜不加味精而去幫趁，反而認為呢 d 係呃師奶嘅手法。

仍然未講碟豉椒牛肉炒麵住！茶餐廳老細唔知係咪以前得罪人多，響餐廳入面定立咗幾條規矩，包括：

• 早上不收一百元或以上大紙；
• 下午不收碎銀；
• 餐茶後上要加五蚊；叫正價餐牌粉麵飯後補餐茶又加五蚊；
• 唔可以叫老細落單，應該先向員工 order；
• 全日唔收十蚊大餅；
• 不准移動餐枱。
  

我開頭以為去咗監獄入面食飯..... 到豉椒牛肉炒麵上枱......少油少鹽已經咸到飛起，如果正常油鹽份量仲點食？

餐廳入面有三名操咸淡廣東話嘅師奶待應，我入嚟咁耐，佢地三個就搏命擘大喉嚨傾計。雖然係茶餐廳，但地方唔大，駛唔駛搏老命咁大叫呢？

總體而言，王廚茶餐廳扮健康但實際油鹽唔輕手。不過，到餐茶上枱時 -- 我叫咗杯凍杏霜 -- 就應該唔係少糖，直頭冇落糖。唉，引用番 title ，"未食已經小小聲，食完直情 X 那聲"

下集講午餐
~~請看另 post~~