不計時間的單車比賽 -- 長春社「山嶺綠騎」2013

egg_studio

尋日參加首屆長春社「山嶺綠騎」越野單車比賽，不過與一般比賽唔同，此比賽不計速度及時間（其實係計，不過對於經驗車手，計同唔計都冇乜分別，見下文）。

參加車手二人或四人一隊（不過，尋日比賽全部都係二人一隊。），路線為「逆環塘」，其中設有六個「遊戲站」，要響「遊戲站」玩十分困難嘅遊戲，然後攞分，最後以分數高低而定勝負。

比賽時限三小時，但一般環塘一小時以內已輕鬆完成，所以對於尋日嘅參賽車手，呢個時限冇壓力。


晨咁早（7am）到達會場，鬼影都冇隻。



寄行李、登記等等繁文縟節。



起步 -- 每兩分鐘出一隊。



第一個遊戲：將各種垃圾擲入垃圾分類紙箱，不過其中報紙、發泡膠杯、375ml 紙包飲品因風阻關係，十分難擲。（其中成功將 375ml 紙包飲品盒擲入「藍紙張」，但原來 375ml 紙包飲品盒應分類為「黃金屬」，所以擲中反而被扣分！）



第二個遊戲：從文字描述響樹林搵番描述嘅植物，對冇讀過植物分類嘅人，又係十分困難。


第三個遊戲：響 3.7km 主要上山路上進行計時賽，不過唔計分，只係響萬一有同分情況下先會計呢個「遊戲」嘅成績。



第四個遊戲：響十分狹窄嘅路面上「打 8 字」，不可以車中地上嘅各種動物（模型）。



第五個遊戲：響大欖水塘水壩記低出現過嘅動植物（圖片），然後響 checkpoint 憑記憶記番晒出嚟。



第六個遊戲：響十幾米以外以肉眼「觀察」各種 size 照片，然後響五本動植物書籍上搵番動植物名稱，限時 8 分鐘。其中 2R 相響十幾米外觀察，已經細到睇唔到，此遊戲又係十分困難。

最後，因為響第一個及第二個遊戲嚴重失分，雖然第 3-6 遊戲搶番不少分數，結果攞第五，開開心心回家去。

Homan

咁兩位有無得什麼名次呀

egg_studio

Homan 發表於 28-10-2013 08:28 PM
咁兩位有無得什麼名次呀

最尾果句咪有講囉。

egg_studio

齋計「計時路段」，一 d 都唔失禮。